kalakoean soeda kena di intip oleh laen-laen orang jang berada di sitoe.
Sasoedanja tjoba samboetin pembitjara'annja bebrapa orang jang adjak mengobrol padanja, ia doedoek berpikir poela. Ini kali ia keliatan sedikit girang samentara aer moekanja ada oendjoeken tanda, kaloe dalem iapoenja pikiran jang gelap, sekarang soeda moentjoel sedikit penerangan. Sabetoelnja djoega itoe djedjaka soeda mendoesin, bahoea djalan jang paling sampoerna boeat ini, tida laen melaenken tanjaken pada Fredie jang djadi iapoenja kawan baek, dengen begitoe boekan sadja ia bisa taoe siapa adanja itoe nona, tetapi djoega siapa adanja itoe djedjaka jang menganter.
Pembatja tentoe heran, kenapa Nora soeda koendjoengin itoe perdjamoean dengen dianter oleh Tjeng Giok, sedeng biasanja oleh ajahnja sendiri. Boeat ilang ken itoe kaheranan, baek kita terangken doedoeknja hal.
Koetika itoe oendangan disampeken pada Nora, entjek Keng Sin soeda njataken sanggoep anterken poetrinja boeat dateng di itoe perdjamoean. Tetapi sorenja mendadak ia inget bahoea Siang Boe Semarang djoestroe hendak adaken pertemoean antara bestuur goena membitjaraken satoe oeroesan jang berarti hidoep atawa matinja itoe perhimpoenan. Dan lantaran entjek Keng Sin ada sala satoe lid bestuur jang terkenal giat, maka tida heran ia lebih hargaken itoe vergadering dari pada itoe perdjamoean thee. Oleh kerna ini djoega, ia minta soepaja Tjeng Giok soeka djadi penganter poetrinja.
Tetapi tentoe masi ada hal jang tida abis dimengerti, bagimana satoe nona dari bangkoe H.B.S. soeda moesti dianter-anter tjara demikian, apa poela perginja ini ada boeat satoe pertemoean di roemah sala satoe sobat prampoeannja, dan kenapa tida dianter sadja oleh iboenja.
Toch pembatja aken djadi mengarti djoega, maski dengen anggep katerlaloean sekali, kaloe kita bilang, bahoea entjek dan entjim Keng Sin ada sanget kolot, hingga kendati anaknja disekolaken sampe di sekola pertengahan, toch ia tida maoe kasiken kamerdika'an begitoe loeas, boeat pergi sendirian di waktoe malem.
Sekarang baeklah kita tengok lagi itoe medan perdjamoean, jang dengen ringkes sadja kita bilang, bahoea di sitoe tida ada kedjadian apa-apa jang penting, katjoeali di fihaknja orang-orang lelaki jang pada merasa kagoem atas Nora poenja kaeilokan dan tjara bergaoel jang tida kikoek, samentara di fihaknja orang-orang prampoean teroetama gadis-gadis pada merasa ketarik dan heran atas Tjeng Giok poenja sikep jang keren tetapi adem.
Satoe djam berselang itoe perdjamoean telah berachir, semoea tetamoe pada kaloear boeat tjari hawa oedara jang seger. Ada jang djalan-djalan di sepoeternja itoe kebon, ada jang doedoek meroko di plataran depan sembari mengobrol, tegesnja masing-masing boleh tjari kasenangannja sendiri.
Nelly bersama toendangannja sedeng asik mengobrol dengen roepa goembira sekali di bawah poehoen Tjemara, jang memang ada disediaken bebrapa bangkoe besi dan satoe medja. Nora kita lantes bisikin Tjeng Giok boeat diadjakin djalan-djalan kiterin itoe kebon, tapi kendati marika djalan berendeng, toch satoe sama laen tida ada jang oetjapken barang satoe perkata'an.
Anak moeda kita poenja mata ditoedjoeken tida keroean djoentroengannja, samentara itoe nona poen
