— 14 —
— 15 —
dateng di djam lima, dan sekarang ternjata soeda satengah djam liwat. Tetapi saja doega sadja kaloe ini ada boeat oeroesan voetbal.”
„Kaloe begitoe papa tentoe soeda loepa, hingga sepoelangnja ka roemah lantaran lelah ia lantes masoek tidoer; saja denger papa dari pagi soeda kaloear sama brapa sobat andenja dari laen kota, jang soeda adjakin ia djalan-djalan ka Boroboedoer. Saja harep sadja engko tida djadi ketjil hati, kaloe lantaran itoe kealpahan dari papa, engko soeda moesti didjemoer sakean lama. Sekalian soeda ada disini, saja rasa lebih baek engko toenggoe sadja sabentaran lagi, kerna siapa taoe kaloe oeroesan jang hendak dibitjaraken djoestroe ada penting.”
„Trima kasi boeat kaoe poenja kebaekan, nona, tetapi menjesel sebab saja masi ada laen kaperloean maka kaoe poenja perminta'an saja tida bisa penoehken. Saja rasa ada lebih baek kaloe saja balik poela pada satoe djam kamoedian, dan kapan nona tida kaberatan saja harep sekali nona nanti toeloeng sampeken sama entjek bahoea saja soeda dateng disini dan berdjandji balik kombali.”
„Baek, 'ko, tjoema apatah saja bisa dapet taoe engko poenja nama jang terhormat ?” tanja poela Nora, sebagimana lajiknja kebiasa'an dari anak-anak jang dapet didikan Barat. „Agar sabentar kapan papa soeda bangoen saja bisa kasi taoe padanja.”
„Saja poenja nama Tjeng Giok. . . .” djawab itoe djedjaka, dan waktoe terangken iapoenja nama sendiri, Tjeng Giok keliatan maloe sekali.
„Och, engko Tjeng Giok?” kata Nora saroepa orang jang menegesin, tetapi sabetoelnja ia sendiri memang soeda taoe. „Apatah engko ada itoe persoon djoega jang malem tadi soeda dikasi hadia'an medali mas oleh papa? Kaloe betoel saja kasi slamet boeat itoe kahormatan,” menjamboeng poela itoe gadis, sebagi orang jang sengadja boeka djalan boeat ia bisa bitjara lebih pandjang.
„Saja betoel ada itoe orang jang nona maksoedken, tetapi itoe pembrian slamet saja tida sanggoep trima, kerna itoe ada terlaloe besar sekali, lebih lagi itoe poedjian besar sabetoelnja tida haroes dibriken pada saja sadja, kerra kapan zonder bantoean laen-laen kawan saja tentoe tida bisa bermaen begitoe roepa.”
„Tetapi toeroet tjeritanja orang banjak, begitoe poen papa sendiri, saja dapet warta, kaloe ini memang ada lajiknja boeat kaoe trima sendiri, kerna dalem itoe lapangan kaoe sadja jang djadi bintangnja. Nah, kapan engko rasanja maloe trima sendiri, baek sampeken djoega saja poenja poedjian boeat itoe brapa spelers dari engko poenja elftal.”
„Trima kasi, nona; sekarang saja permisie sadja, kerna saja maoe oeroes laen kaperloean.”
Sambil manggoetken kepalanja, Tjeng Giok laloe paranin fietsnja, tetapi sesa'at mana di roeangan sabelah dalem ada kadengeran pintoe diboeka, maka Nora lantes panggil poela itoe djedjaka.
„Engko, saja rasa itoe soeara terboekanja pintoe ada terdjadi di kamarnja papa jang baroe bangoen, apa baek saja panggil doeloe padanja, dan engko toenggoe samentara waktoe lagi?”
Maski sabetoelnja ia ada laen kaperloean, toch inget ia soeda dateng di sitoe dan djoestroe itoe orang jang ditjari tida lama lagi bisa dikatemoeken, maka ia njataken setoedjoe atas pikirannja itoe nona. Samentara Nora laloe masoek ka dalem boeat kasi taoe itoe hal pada ajahnja. Tetapi ternjata itoe ajah
