Halaman ini tervalidasi
— 60 —
FATSAL XIV.
Perang jang ka-tigablas.
Selang bebrapa hari sasoedanja Djendral Lauw ambil kasenangan sedikit waktoe, maka pada swatoe hari Djendral Lauw ada bikin perdamian pada sekalian ponggawa-ponggawanja aken moefakat boeat oesir pada orang-orang Japan jang ada doedoek di loear poelo Taij Pak, maka Djendral Lauw ada toelis sepotong soerat boeat terkirim pada Djendralnja orang Japan, seperti demikian boenjinja:
| Dengen ini soerat kita kasi taoe, djikaloe betoel angkau satoe laki-laki nanti besok pagi kita orang bole boeka perang lagi dengen berdepan sama-sama 1000 bala tentara di medan peprangan, disitoe kita orang maoe meliat dari angkau poenja bala tentara poenja kepandean dan kegagahan, djikaloe angkau bisa kalahken kita poenja barisan, nanti ini Poelo Taij Wan kita lantas pasraken padamoe, djikaloe angkau tiada bisa kalahken kita poenja barisan baelah angkau bole tjepet laloe dari ini tempat, djangan sampe bikin kita poenja marah, soeda tentoe angkau poenja njawa kita bikin linjap sekalian.” Minta balesan, Djendral LAUW. |
Satrimanja itoe soerat Djendral Japan mendjadi marah, sigrah djoega soerat itoe di balesin dengen lekas aken menoeroetin maksoednja Djendral Lauw,
