- 43 -
FATSAL X.
Perang jang ka-sembilan.
Radja Japan Micado serta trima soeral dari Djendralnja soeda tentoe mendjadi kaget dan berpikir serba sala, kerna soldadoe jang ada di negrinja soeda tinggal sedikit, jang kaloe sadja maoe di kirim ka Taij Wan, didalem negri sendiri djadi kosong, djadi disitoe Radja Japan prenta pengawanja boeat paksa pada anak negrinja sendiri aken di djadiken soldadoe jang lantas sadja soeda dapet kira ada 5 à 6000 orang dengen mendadak lantas di adjar baris, komedian lantas toeroen kapal boeat brangkat pergi menjerang ka Taij Wan, samoea ada kapal perang langkep dengen sendjata, satelah 12 kapal itoe soeda sampe dimana loear pelaboean Taij Lam bertemoe sama itoe satoe kapal kambratnja jang lantas kasi tjerita serta berdami dari hal ini angkatan perang, tetapi kapal prang Japan soeda ada 4 à 5 hari blon djoega brani boeat masoek lagi kedalem kwala Taij Lam, kerna marika itoe takoet kaloe-kaloe nanti kena di tipoe lagi oleh orang Taij Wan, tjoema marika itoe tembakin mariam dari loear sadja pada benteng-benteng jang ada dimana itoe kwala, tapi tiada bergoena satoe apa, kerna tembakan itoe tiada di ladenin, dan soeda bebrapa hari Djendral Lauw tinggal diam tjoema liatin sadja kelakoeannja orang Japan jang ada di loear moeara itoe, jang mana orang Japan pikir djadi serba sala.
