Djendral Japan denger itoe kabar ada sanget morkanja, beserta satoe sama laen ada moefakat jang sabole bole hendak membinasaken di antero poelo Taij Wan, maka kira ada satoe doea hari komedian Djendralnja orang Japan lantas komendir soldadoenja boeat menjerang masok kadalem poelo Taij Pak bilangan Taij Kho Kain di mana betoelan watesnja bilangan orang Tjhe Hoan (orang batak) disitoe balatentara orang Japan ada berdiriken tangsi.
Orang bangsa Tjhe Hoan dapet liat dari atas goenoeng jang orang Japan ada membikin tangsi disitoe, lantas marika itoe mengoempoelken bebrapa banjak kambratnja laloe toeroen dari atas goenoeng dengen membawa api (obor) dan bersendjata golok, pedang dan toembak lantas timpoek itoe obor di mama tangsinja orang Japan jang lantas sadja djadi terbakar, dan balanja Japan lari kalangkaboet ada djoega jang mati terbakar, lantas sadja marika itoe berantem sama orang Tjhe Hoan, tetapi dari sebab orang-orang Tjhe Hoan tjoema pegang gegaman tadjem sadja tiada poenja snapan maka marika itoe trada bisa tahan sama orang Japan dan lantas lari naek ka atas goenoeng saperti koetjing jang dengen sabentaran sadja soeda linjap saperti setan adanja, — orang Japan ada ingetan boeat oedak pada pada marika itoe, tapi dari sebab orang Japan tiada bisa naek di atas goenoeng jang begitoe lebat, mendjadi orang Japan lantas balik poelang dengen oering-oeringan.
Kombali sekarang kita orang liat pada Djendral Lauw jang sasoedanja abis mengatoer dari perkara negri, serta ambil kasenangan boeat sedikit waktoe,
