tiada sebrapa banjaknja saniingkin lama samingkin abis pada mati, kerna moelai perang dari waktoe tengahari sampe sore, orang Japan soeda merasa tiada bole tahan sebab obat pasang soeda moelai abis lagi soldadoe soeda banjak mati, tambahan belon sempet makan peroet lapar, maka itoe waktoe bala Japan tiada tinggal brapa ratoes jang masi melawan pada bala Taij Wan, sahingga lakoenja ada bingoeng sekali, lantas boeang sendjatanja teroes lari kalang kaboet, dan bala Taij Wan liat begitoe lantas kedjar sadja padanja, tetapi bala Japan banjakan jang lari menoedjoe ka sebla Lor di bilangan Kie Liong, kerna disitoe marika itoe ada harepan dapet pertoeloengan pada kawankawannja jang ada berdiam di Kie Liong, tetapi balanja Taij Wan teroes kedjar sadja padanja, sampe balanja Japan katingalan tiada brapa orang dan jang mati maitnja ada beslingkatan di tana bertoempoek-toempoek soesoen tindi, daranja pada meloela'an seperti oedjan, berbaoe amis.
Tatkala bala Japan jang ada di Kie Liong liat begitoe lantas marika itoe samoea kloear hendak membantoe aken melabrak bala Taij Wan, tetapi bala Taij Wan liat bala Japan dateng bantoe lantas moendoer dengen sigra pergi di Saij Kioe Nia aken mendoedoekin disitoe, serta di preksa balanja Japan jang mati ada 1000 kepala lebi sama satoe panglimanja, dan bala Taij Wan sendiri jang mati tjoema tiada brapa banjak, pekakas perang dan ramsoem poenjanja Japan jang masi ketinggalan di Saij Kioe Nia dan di boeang dimana djalanan samoea Lim Koan Tjat prenta soeroe bawa poelang.
