-120-
karadjinannja Lanw Gie, maka radja An Lam merasa soeka hatinja, apa lagi sedari adanja Lauw Gie disitoe tiada kadengeran lagi ada peroesoehan atawa jang bikin hoeroe hara disitoe, kerna sekalian anak negri jang mana soesa atau jang miskin semoea di panggil oleh Lauw Gie di soeroe bekerdja boeat boeka sawa atau bikin kebon serta di bajar oepa begimana patoet.
Dari sebab itoe maka radja An Lam poedji betoel padanja serta di briken persent lagi pada Lauw Gie bebrapa kerbo, sampi, koeda dan bibit-bibit boeat goenanja orang tani bekerdja, maka Lauw Gie sesoedanja trima itoe persenan, lantas djoega di bagi-bagi pada orang-orang tani boeat bekerdja sawa dan kebon, serta bikin bebrapa banjak roema atau gedong-gedong jang di atoer begitoe rapi sekali, sahingga itoe tempat jang tadinja oetan, sekarang soeda djadi seperti swatoe negri jang netjis, dan itoe tempo namanja Lauw Gie di koeliling tempat telah terpoeidji dari kepandeannja.
Satelah Lauw Gie meliat dan berpikir jang tempatnja sekarang soeda djadi bagoes serta banjak djoega poengoet kehasilan. mendjadi Lauw Gie ingetan pegang tetep itoe tempat serta di bikin swatoe kota jang di atasnja lantas di kiberken satoe bendera item, serta di kabarken pada di koeliling tempat poenja orang jang ada poenja kapinteran bole dateng padanja hendak di briken pakerdjahan dengen sepantesnja.
Kabar ini sigra djoega soeda sampe di koeliling tempat dan sekalian orang-orang jang pandei sigra djoega dateng padanja aken mendjabat pakerdjahan boeat berdiriken bebrapa banjak fabriek-fabriek roepa-roepa matjem disitoe.
