— 99 —
bisa lolos, lantas preksa itoe perkara, komedian baroe dapet taoe, kerna satoe mantri jang djaga di kwala soeda tiada menoeroet betoel sabegimana soeda di prentahken padanja, sebab seblonnja kapal Japan masoek samoea didalem moeara dia itoe soeda pasang itoe tanda mariam jang mana mendjadi itoe tipoe tiada landjoet samoea, maka dari itoe Djendral Lauw lantas prenta soeroe potong kepalanja itoe mantri jang soeda bikin sala begitoe roepa, soepaja jang laen-laen djoega djangan sampe brani bikin alpa lagi didalem pakerdja-annja.
——————
FATSAL XXIV.
Perang jang ka-doea poeloe tiga.
——————
Sasoedanja selese perang di atas ini, maka di bilangan Taij Lam poenja orang-orang ketjil ada mendapet senang dan itoe tempo ada keliatan sepi sadja, tapi di bilangan Taij Pak orang-orang ketjil samoea masi merasa kwatir jang kaloe-kaloe itoe orang-orang Japan jang masi ada di sebla laoet nanti dateng lagi, tetapi bole di kata ini tempo orang Japan soeda matikoetoenja hingga tiada brani bergerak lagi.
Komedian ada dateng kabar, jang di bilangan Taij Tiong poenja tempat soeda kedatengan satoe kawan perampok jang kepala-in itoe perampok bernama Lie Hong Kwe, orang dari bilangan negri Tjina jang dateng disitoe dengen praoe-praoe ketjil sadja, orangnja ada bilang ratoes banjaknja sakoenjoeng-koenjoeng soeda dateng menjerang di Taij Tiong dan soeda me-
