mintang atawa Party Rajat, jang baroe didiriken oleh Sun Yatsen dalem taon 1912 boeat gantinja Tung Min Hui. Party ini poen berhaloean pemerentahan repoeblik. Keliatannja seperti pemerentahan sewenang-wenang dari satoe orang dengan kekoeasaan tida berwates achir achirnja aken tamat.
Tapi sigera aken ternjata, ini National Assembly tida ada mempoenjai kekoeasaan apa-apa. Yuan Shih Kai telah bikin pembitjaraan sama sekoempoelan bank Inggeris, Frans, Duits, Djepang dan Rus boeat bikin pindjeman sedjoemblah besar. Pembitjaraan tentang hal ini soedah ampir beres, tatkala National Assembly bersidang di Peking. Menoeroet grondwet boeat sementara waktoe, poetoesan boeat bikin oetang goena negeri moesti diambil oleh Assembly. Tapi Yuan Shih Kai boeroe-boeroe bikin slese itoe oeroesan bikin oetang, dengan alesan, idzin boeat ia bikin itoe oetang soedah dikasih oleh National Council jang doeloe. Perdjandjian oetang itoe diteeken pada 25 April 1913, kendati diprotest keras dan diantjem nanti tida diakoe sah oleh Assembly. Oetang itoe besarnja 25 millioen pond sterling, satoe djoemblah besar boeat itoe waktoe. Dalem sedikit tempo soerat oetang itoe lakoe habis.
National Assembly djadi menjesal kerna ini oeroesan. Harepan satoe-satoenja, menoeroet pikirannja itoe Assembly, jalah bikin rampoeng grondwet jang tetap. Begitoelah itoe Assembly bekerdja membikin rampoeng itoe grondwet.
Sementara itoe, di sebelah selatan dari Yangtze, kejakinan jang Yuan Shih Kai hendak djadi dictator, hendak memerentah seorang diri sadja dengan kekoeasaan tida berwates dan bikin mati angen angen boeat pemerentahan repoeblik, bertambah keras. Dalem boelan Juli 1913 terbit repoloesi, jang dinamaken Repoloesi Kedoea. Tapi repoloesi ini djelek diatoernja dan alatnja poen koerang. Dalem sedikit tempo Yuan Shih Kai poenja tentara model baroe bisa tindes pembrontakan itoe.
Yuan Shih Kai sekarang kepingin pemerentahnja diakoe sah oleh negeri negeri asing. Boeat itoe perloe ia poenja kedoedoekan sebagi president boeat sementara waktoe dirobah djadi president jang tetap. National Assembly, jang dibikin djerih sama tjaranja Yuan Shih Kai tindes pembrontakan di Yangtze, disoeroeh bikin rampoeng itoe bagian dari grondwet, jang menentoeken atoeran perihal memilih president dan bikin bagian itoe djadi wet. Kemoedian Yuan Shih Kai dipilih djadi president tetap, jang diambil soempahnja pada 10 October 1913. Li Yuan Hung dipilih djadi vice-president. Sesoedah itoe baroelah Repoeblik Tiongkok diakoe sah oleh negeri negeri asing. Sesoedah slese itoe semoea, mendadak anggota anggotanja Assembly, jang mendjadi anggota Kuomintang, didakwa telah membantoe pemimpin pemimpin dari pembrontakan di boelan Juli. Tanggal 5 November, belon seboelan sesoedah ia dipilih djadi president tetap. Yuan Shih Kai kloearken firman jang boebarken party Kuomintang dan oesir dari National Assembly ampat ratoes tiga poeloeh delapan anggota Kuomintang, jang djadi anggotanja Assembly. Marika dikasih taoe, djiwanja bisa berbahaja, kaloe marika tinggal teroes di Peking. Marika lantas pada brangkat dari Peking. Kerna itoe maka sisanja anggota Assembly jang masih ada di Peking, tida tjoekoep banjak boeat bisa bikin vergadering jang sah, menoeroet penetapan dalem grondwet boeat sementara waktoe. Begitoelah sedjak itoe waktoe itoe Assembly tida bisa bersidang dan tida bisa bikin apa-apa lagi alias djadi mati sendirinja dan Yuan Shih Kai moelai itoe tempo memerentah seorang diri dengan kekoeasaan tida berwates, sampe pada harian ia menoetoep mata, jaitoe doea stengah taon sehabisnja ia poenja perboeatan jang ditjeritaken tadi.
-144-
-145-
