moeran soedah kombali dalem negeri. Beberapa perserikatan resia itoe ada besar dan bermaksoed meroeboehken pemerentah, lain lain poela tjoema ketjil dan maksoednja melainken boeat oesir pembesar di tempatnja atawa salah seorang toean tanah jang kedjem.
Jalah perkoempoelan perkoempoelan sematjem ini jang telah menjokong Chu Yuan Chang boeat roeboehken ahala Mongool dan diriken ahala Bing Tiauw. Perkoempoelan perkoempoelan sematjem itoe djoega jang telah memberi kekoeatan pada pembrontakan Taiping. Kendati ditindes dengan keras oleh pembesar pembesar, toch di achirnja abad jang doeloe perkoempoelan perkoempoelan resia itoe masih hidoep soeboer dan mendjadi moesoeh jang tanggoeh dari bangsa Mantjoe. Di waktoe waktoe jang kaloet, jang kemoedian terdjadi, perkoempoelan perkoempoelan resia itoe mendjalanken rol penting. Lebih kemoedian lagi perkoempoelan perkoempoelan itoe mendjadi penjakit boeat Djepang di Mantjoeria.
Barang tentoe tatkala Sun Yatsen moelai ia poenja gerakan repoloesioner, ia lantas berdaja boeat dapetken toendjangannja ini perkoempoelan perkoempoelan jang soedah ada dan jang memoesoehi pada bangsa Mantjoe. Sebelonnja Sun diriken ia poenja Hsing Chung Hui, salah satoe perkoempoelan resia jang paling besar dan paling koeat, jaitoe Ko Lao Hui, soedah menjokong pada Sun Yatsen. Tapi ini perkoempoelan perkoempoelan resia melainkan disoeroeng oleh kebentjiannja jang sanget pada bangsa Mantjoe dan keinginan boeat roeboehken ahala Mantjoe. Maksoednja Sun Yatsen boeat bikin baroe atoeran memerentah di Tiongkok, tida dimengerti oleh itoe perkoempoelan perkoempoelan resia. Makanja Sun Yatsen poenja gerakan boeat mendiriken pemerentahan repoeblik dapet sokongannja itoe perkoempoelan perkoempoelan resia melainkan sampe pada waktoenja itoe gerakan berhasil meroeboehken kaoem Mantjoe sadja. Abis itoe maksoed maksoednja Sun Yatsen loepoet dari pahamnja itoe perkoempoelan perkoempoelan resia.
Sokongan boeat maksoed maksoednja ini Sun Yatsen poen tida bisa dapet dari kaoem terpeladjar koeno dan kaoem soedagar di Tiongkok. Marika tida bisa setoedjoe sama Sun Yatsen poenja maksoed mendiriken pemerentahan repoeblik.
Maka itoe boeat dapetken sokongan oentoek ini bagian dari maksoednja, Sun Yatsen moesti tjari orang orang Tionghoa jang soedah beladjar di Djepang atawa di negeri negeri Barat. Marika ini tentoe sadja kebanjakan ada orang orang jang masih moeda sekali.
Begitoelah penjokong jang teroetama dari Sun Yatsen poenja gerakan repoloesioner terdiri dari orang orang tani jang kepingin berontak asal berontak sadja dan anak anak moeda jang berdarah panas.
Sedang keadaan di dalem negeri soedah bergolak begitoe keras, pemerentah Mantjoe tambah lagi satoe perkara baroe, jang seoepama minjak disiremken di api.
Dalem taon 1905 di seloeroeh negeri ada kegoembirahan besar boeat bikin djalanan djalanan kreta api. Pemerentah Mantjoe waktoe itoe andjoeri orang orang kaja di berbagi bagi tempat boeat bikin djalanan djalanan kreta api jang perloe dalem masing masing provincienja. Dalem taon 1909 pemerentah di Peking robah ini politiek dan ambil poetoesan boeat taroh itoe semoea djalanan kreta api, jang soedah direntjanaken, di bawah penilikannja pemerentah sendiri, Djalanan djalanan kreta api itoe hendak didjadiken milik negeri. Maka itoe di permoelaan taon 1911 didiriken kantor oeroesan perhoeboengan, dengan dikepalai oleh Sheng Hsuan Huai. Tanggal 10 Mei 1911 dibikin pindjeman sama satoe perserikatan bank Inggeris, Frans, Djerman dan Amerika boeat bikin itoe djalanan djalanan kreta api.
Politiek ini telah melahirken protest baroe dan keras dari orang orang jang paling berpengaroeh dalem berbagi bagi provincie, di mana soedah dimoelai pembikinan djalanan kreta api. Sebab sebabnja itoe protest ada matjem matjem. Banjak keberatan disebabken oleh kekoeatiran jang masih teroes ada, jang djalanan djalanan kreta api itoe nanti djatoh di bawah kekoeasaan asing. Banjak djoega keberatan disebabken oleh halnja itoe perobahan politiek dianggep sebagi perampasan dari hak haknja provincie oleh pemerentah di Peking. Tapi sebab paling oetama dari keberatan itoe adalah tida adanja kepertjajaan barang sedikit pada pemerentah Mantjoe dan pada kepala jang baroe diangkat dari kantor oeroesan perhoeboengan. Djoega orang orang jang mengerti perloenja boeat pake kapitaal asing dan perloenja djalanan djalanan kreta api di Tiongkok terkoempoel mendjadi satoe, pandang itoe perobahan politiek dari pemerentah meloeloe sebagi alesan sadja boeat loeasken kekoeasaannja kaoem ambtenaar Mantjoe jang kolot dan marika poenja pembantoe pembantoe Tionghoa jang boeroek.
Dalem provincie Szechuan, di mana orang orang partikelir soedah koempoel tiga millioen dollar boeat bikin djalanan kreta api dalem itoe provincie, keadaan dibikin roewet oleh halnja sebagian besar dari itoe oewang soedah ditelan oleh pengoeroes pengoeroes nja itoe kongsi. Aandeelhouder aandeelhouder minta, pemerentah tanggoeng boeat kasih kombali marika poenja oewang dan tatkala itoe tanggoengan tida dikasih, dalem berbagi bagi bagian dari provincie Szechuan lantas terbit peroesoehan peroesoehan besar. Di
-136-
-137-
