itoe djadi pendjaranja Kuang Hsu. Ia meninggal dalem itoe pendjara.
Sigera sesoedahnja keizer ditangkep, kloear seboeah firman, jang dibilang firmannja keizer, tapi sebenarnja boekan karangannja keizer. Firman itoe menjeritaken kesoekaran kesoekaran pada itoe waktoe, memperingetken pahala pahalanja Tsu Hi pada negeri dan memberitahoeken jang Tsu Hi achirnja, sesoedah lama dan beroelang oelang diminta oleh keizer, menjataken moefakat sama permintaannja keizer boeat pegang poela kendali pemerentahan.
Kuang Hsu tida sampe disoeroeh boenoeh oleh Tsu Hi. tentoelah sebab ini iboe soeri takoet boeat kritik dan tjelaan dari censor censor Tionghoa, Tapi terhadep pada adpisoer adpisoernja Kuang Hsu, Tsu Hi tida pake soengkan-soengkanan lagi. Beberapa antaranja ditangkep dan dihoekoem mati. Tapi beberapa orang dapet melarikan diri, antaranja adalah Kang Yu Wei dan Liang Chi Chao.
Demikianlah itoe perobahan perobahan dari seratoes hari berachir dan Tsu Hi kombali memerentah dengan kekoeasaan tida berwates.
Tsu Hi djalanken politiek baroe boeat tjegah moesnanja Tiongkok. Perobahan perobahan jang diingin oleh Kuang Hsu aken didjalanken djoega, tetapi dengan pelahan. Lebih djaoeh Tsu Hsi maoe bikin negeri negeri Barat djadi endahken pada Tiongkok. Maka itoe pada berbagi-bagi oetoesan asing ia kasih taoe, Tiongkok boeat sementara waktoe tida aken kasih concessie lagi, biar concessie apa sadja.
Dalem taon 1899 pemerentah Italie tjoba dapetken djoega tempat di Tiongkok. Tanggal 28 Februari oetoesan Italie terimaken soerat permoehoenan boeat sewa teloek San Men dalem provincie Chekiang aken dipake sebagi station kapal kapal Italie moeat areng batoe. Lebih djaoeh Italie minta concessie boeat boeka parit dan djalanan kreta api di bagian selatan dari itoe provincie. Itoe rekest dari Italie ditoendjang oleh Inggeris, tapi maski begitoe, toch pemerentah Tiongkok toelak permoehoenan itoe mentah mentah dan kombaliken itoe rekest. Tanggal 10 Maart oetoesan Italie tjoba dapetken maksoednja dengan kirim ultimatum, tapi itoe perboeatan tida disetoedjoe oleh pemerentah Italie. Itoe oetoesan dipanggil poelang dan permintaan permintaannja dioeroengken.
Maskipoen hal ini keliatannja perkara ketjil sadja, tetapi dalem kalangan pemerentah Tiongkok dan di antara rajat Tionghoa hal itoe telah menjebabken kegoegoepan dan gerakan besar. Tentara dari provincie. Kansu jang djaoeh dikasih dateng di Peking, pembesar pembesar dari provincie provincie di sepandjang pasisir dikasih prentah aken awas boeat sesoeatoe serangan dari fihak asing. Kabar kabar angin perihal bangsa asing aken menjerang poela pada Tiongkok, tersiar loeas di antara rajat segala golongan.
Di moesim rontok dari taon 1898, tatkala semoea tentara model baroe jang ada sedia di Tiongkok Oetara soedah dikoempoel di Peking, Tsu Hi kloearken firman, jang mewadjibken pembesar provincie, kota dan desa di Tiongkok Oetara boeat hidoepken poela atoeran milisi dari doeloekala sebagi persediaan, djikaloe negeri asing menjerang Tiongkok.
Penjiapan dari ini barisan milisi dibikin gampang oleh adanja banjak orang, jang soedah djadi mata gelap kerna kesoesahan lantaran ada hawa panas keras jang lama di semoea provincie di Oetara, Banjak kawanan bandiet poen toeroet masoek dalem itoe barisan milisi. Di moesim panas dari taon 1899 banjak barisan itoe dalem provincie Shantung dan Chili (Hopei) pake nama I Ho Tuan atawa „Barisan dari Keakoeran jang djoedjoer. Kadang kadang marika djoega diseboet I Ho Chuan atawa „Kepelan dari Keakoeran jang djoedjoer. Kerna ini nama, maka orang Inggeris kemoedian kasih marika nama kaoem Bokser atawa Pakkoenthauw.
Sedari moelai didiriken, ini barisan barisan bokser sanget bentji orang asing. Barisan barisan itoe mendjelma paling banjak dan paling tjepat djoestroe dalem provincie provincie, jang baroe-baroe ini daerahnja paling banjak djatoh dalem tangan asing. Jang nomer satoe dibentji oleh ini barisan barisan bokser adalah orang asing. Jang nomer doea dibentji olehnja adalah orang orang Tionghoa jang masoek igama Kristen, jang dikasih nama „setan asing klas doea. Kebentjian ini disebabken oleh halnja pendita pendita kristen di Tiongkok soeka toeroet tjampoer dalem perkara perkara, dalem mana orang orang Tionghoa kristen djoega ada terlibet.
Dalem boelan November 1899 oetoesan oetoesan dari negeri negeri, jang pendita penditanja ada bekerdja dalem provincie Shantoeng, moelai desak pada pemerentah di Peking soepaja diambil atoeran atoeran jang sampoerna boeat tindes gerakan bokser dalem itoe provincie. Gouverneur dari itoe provincie, Yu Hsien, jang bentji keras pada orang asing, djadi boelan boelanan dari kritiknja oetoesan oetoesan asing. Tanggal 6 December ia diganti sama Yuan Shih Kai. Tanggal 30 December, sebelonnja Yuan Shih Kai sempat djalanken kekoeasaannja sebagi gouverneur baroe, seorang pendita Inggeris diboenoeh oleh beberapa anggota dari perserikatan bokser. Yuan Shih Kai lantas tangkep dan hoekoem pemboenoeh pemboenoehnja. Doea dihoekoem mati, satoe dihoekoem seoemoer hidoep dan jang sisanja doea orang dihoekoem boeang.
-124-
-125-
