biasa lakoeken pekerdjaan lain, selainnja dari djadi serdadoe, banjak samoerai makan habis oewang contant jang marika terima dan terpaksa hidoep seperti pengemis dari pengasilan jang besarnja tjoema satoe per sepoeloeh atawa paling banjak satoe per lima dari pengasilannja tempo djadi serdadoenja toean tanah.
Pada ini kesoesahan dalem penghidoepan ditambah lagi atoeran pemerentah, jang oleh kaoem samoerai itoe diartiken sebagi hinaan pada dirinja. Dalem boelan Januari 1872 dipanggil semoea orang, jang oleh atoeran baroe diwadjibken djadi serdadoe. Marika ini dipanggil boeat dikasih pendidikan sebagi serdadoe oentoek angkatan perang model baroe, jang diatoer setjara atoeran Barat. Dalem boelan Augustus 1876, berbareng sama pemberian tahoe jang mewadjibken semoea orang djoeal pensioennja, dikloearken firman jang melarang semoea orang pake pedang, ketjoeali orang-orang jang djadi serdadoe dalem tentara jang diatoer menoeroet atoeran baroe.
Banjak samoerai di berbagi-bagi bagian dari negeri Djepang laloe berontak. Kebanjakan pemberontakan itoe dilakoeken oleh samoerai dalem goendoekan-goendoekan ketjil sadja, jang bergerak terpisah dari satoe sama lain. Maka itoe kebanjakan pemberontakan itoe dapet ditindes dengan gampang oleh pemerentah. Tapi di bagian selatan dari Kyushu, di mana samoerai dari kaoem Satsoema berontak dalem djoemblah besar dengan dikepalai oleh Saigo, jaitoe salah seorang daimyo jang telah moelai gerakan boeat bikin baroe negeri Djepang, pembrontakan itoe meroepaken satoe pemberontakan besar. Pemberontakan itoe moelai pada 29 Januari 1877 dan diteroesken sampe 24 September dari itoe taon djoega. Achirnja ternjata, tentara pemerentah, jang dididik dan dipersendjataken model baroe, ada lebih koeat dari kaoem samoerai itoe. Pemberontakan itoe dapet ditindes dan samoerai jang masih hidoep, pelahan-pelahan kena leboer dalem golongan rajat biasa.
Pemasangan djalanan kreta api dan perhoeboengan kawat, pendirian kantor-kantor post, perobahan perobahan dalem oeroesan pertanian dan peladjaran, pendirian dari angkatan perang darat dan angkatan perang laoet model baroe, itoe semoea meminta ongkos-ongkos loear biasa besar dalem sedjarahnja bangsa Djepang. Tentoe sadja ongkos-ongkos itoe mendjatohken beban belasting berat pada rajat. Soepaja bisa memikoel beban belasting jang selaloe bertambah berat, maka pemerentah Djepang menoendjang dan mengandjoeri sebisanja aken rajat membesarken penghasilannja. Pada samoerai samoerai doeloe dikasih tanah dengan harga moerah, soepaja marika dapet penghasilan tjoekoep oentoek hidoepnja. Satoe commissie dibangoenken boeat oeroes pemindahan rajat ke tanah-tanah jang belon dioesahaken di Hokkaido. Masin masin dipake dalem peroesahaan, teroetama dalem peroesahaan kain. Dengan tjepat paberik-paberik berdiri di negeri Djepang. Perobahan dalem oeroesan oewang dan bank-bank jang baroe didiriken memberi djalan jang gampang aken orang mendapet oetang jang perloe boeat peroesahaan paberik model baroe. Pemerentah kasih subsidie pada pembikinan kapal-kapal dagang, jang selaloe bertambah banjak, sehingga orang Djepang dapet hasil jang selaloe bertambah besar dari perdagangan sama loear negeri.
Dalem taon 1872 oeroesan angkatan perang darat dipisahken dari oeroesan angkatan perang laoet. Sedari moelai dibikin itoe pemisahan sampe sekarang, kaoem Satsoema berkoeasa dalem oeroesan angkatan perang laoet dan kaoem Choshoe berkoeasa atas angkatan perang darat. Dalem soeal-soeal politiek jang penting itoe doea kaoem Satsoema dan Choshoe, kerna kekoeasaannja atas angkatan perang darat dan laoet itoe, bisa paksa pembesar-pembesar sipil boeat toeroet apa maoenja. Kerna itoe dan djoega kerna orang-orang dari itoe doea kaoem djadi adpisoer-adpisoernja keizer, maka kedoea kaoem itoe jang sebenarnja-benarnja memegang kekoeasaan memerentah.
Kerna doea kaoem itoe mempoenjai kekoeasaan begitoe besar dalem hal pemerentahan, maka perasaan koerang senang telah dibangoenken dan mendjalar loeas. Ini soedah kedjadian pada sebelonnja pembrontakan samoerai dari taon 1876 dan 1877. Orang-orang jang koerang senang itoe moelai minta diadaken dewan wakil rajat, jang anggota-anggotanja dipilih oleh rajat. Marika dasarken permintaan itoe atas keterangan radja, jang marika artiken berisi djandji boeat adaken parlement, Dalem taon 1881 gerakan minta diadaken grondwet dan parlement mendapet dorongan baroe kerna diketahoeinja keboeroekan dalem oeroesan memindah rajat ke Hokkaido. Di Tokio terbit peroesoehan-peroesoehan, jang menjebabken dibakarnja sedjoemblah kantor-kantor politie. Keada'an djadi begitoe roesoeh dalem kota radja, sehingga didjalanken wet perang. Peroesoehan itoe dapet dipademken, tapi kaoem jang memegang kekoeasaan memerentah insjaf perloenja aken menoeroet pada kehendaknja rajat. Tanggal 12 December seboeah firman radja berdjandji, dalem taon ke doeapoeloehtiga dari pemerentahan Meidji (1890) aken diboeka parlement. Sementara itoe satoe commissie aken bikin persediaan jang perloe boeat itoe maksoed.
Sedikit waktoe sesoedah dikloearken ini firman radja, Ito Hiroboemi dikirim ke loear negeri boeat pahamken berbagi grondwet di benoea Barat. Ito tinggal setaon lamanja di Europa dan Amerika, kemoedian ia poelang ke Djepang. Tanggal 21 Maart 1883
84
85
