1862, Ando Tsoesjima-no-kami, sjogoen poenja manteri oeroesan loear negeri, diserang djoega di tengah djalan, tetapi tida sampe djadi mati, hanja tjoema dapet loeka sadja.
Sampe pada boentoetnja taon 1861 kebanjakan perlawanan pada sjogoen poenja politiek loear negeri dilakoeken oleh anggota-anggota kaoem Tokoegawa sendiri, jang tida tjotjok pikiran sama sjogoen. Oepamanja itoe daimyo dari Mito, Nariaki, orang-orang siapa telah boenoeh ferdana manteri li Naosoeke, adalah kepala dari satoe familie Tokoegawa jang besar dan ajahnja Keiki, toean tanah dari Hitotsubasji, jang kemoedian mendjadi sjogoen jang penghabisan. Ini pertjidraan dalem kalangan kaoem Tokoegawa sendiri betoel ada djahatnja, tetapi ada djoega baeknja boeat sjogoen. Kerna adanja itoe permoesoehan dalem kalangan kaoem koelawarga Tokoegawa sendiri, maka kaoem-kaoem di Djepang Barat, jang besar kekoeatannja dan bentji sekali sama sjogoen, mendjadi bingoeng dan tida sampe berserikat mendjadi satoe boeat memoesoehi sjogoen. Sesoedah Nariaki mati dalem boelan September 1861, perlawanan dalem kalangan kaoem Tokoegawa mendjadi brenti, Moelai dengan brentinja itoe permoesoehan dalem kalangan Tokoegawa sendiri, itoe berbagi-bagi kaoem di sebelah Barat, jang sampe sebegini djaoeh petjah belah kerna sirik hati pada satoe sama lain dan kerna dari antara pemimpin pemimpin koelawarga Tokoegawa sendiri ada jang memoesoehi orang asing, mendadak djadi bersatoe hati dan berserikat sama partij radja di Kyoto jang memoesoehi keras pada orang-orang asing.
Dalem boelan Mei 1862 Shimadzoe Idzoemi, bapanja daimyo dari Satsoema dan kepala dari kaoem Satsoema jang besar, dateng di Kyoto. Tida berapa hari kemoedian daimyo dari Choshoe, Mori Motonori, dateng djoega di itoe kota radja. Choshoe selamanja telah berhoeboengan rapet sama kaoem jang anti orang asing. Tapi Satsoema, maski bentji kaoem Tokoegawa, toch moefakat sama pemboekaan dari negeri Djepang boeat perniagaan asing, sebab negerinja kaoem Satsoema jang dapet oentoeng paling banjak dari itoe perniagaan.
Sesoedah ketemoe di Kyoto itoe doea daimyo dari Satsoema dan Choshoe loepaken perselisihan-perselisihannja waktoe doeloe dan berserikat menoendjang partij radja melawan partij sjogoen. Sigera kedoea daimyo itoe diakoe sebagi pemimpin-pemimpin dari partij radja. Perserikatan itoe dinamaken perserikatan Sat-Cho (Satsoema dan Choshoe). Ini perserikatan berdjalan teroes sampe sekarang dan sesoedahnja kaoem Tokoegawa nanti dapet diroeboehken, jalah ini perserikatan atawa ini doea kaoem Satsoema dan Choshoe jang berkoeasa atas angkatan perang darat dan laoet dari Djepang dan sebab itoe djadi memegang kekoeasaan paling tinggi dalem pemerentah Djepang sampe sekarang. Tapi pada waktoenja perserikatan itoe baroe dibikin, itoe doea kaoem di Djepang Barat djadi kaoem jang paling terkemoeka dalem gerakan anti orang asing sebagi djalan boeat meroeboehken kekoeasaannja sjogoen. Jalah ini doea kaoem djoega jang menjebabken negri-negri Barat menggoenaken kekoeatan sendjata pada Djepang, seperti marika lebih doeloe dari itoe soedah berboeat pada Tiongkok.
Tanggal 14 September 1862 sekoempoelan orang Inggeris, tiga orang laki dan satoe prempoean, menoenggang koeda di djalan besar dekat Yokohama. Marika ketemoe Shimadzoe Idzoemi, jang, dengan di-iringken oleh banjak pengiring, lagi dalem perdjalanan poelang dari Yedo. Pengiring-pengiringnja itoe daimyo bilang, itoe orang-orang asing telah melanggar peradatan, tida menoendjoeken hormat dan peradatan sebagimana moestinja, kaloe ketemoe sama seorang daimyo besar seperti Shimadzoe Idzoemi, Itoe pengiring-pengiring jang bersendjata laloe serang itoe orang-orang asing. Seorang Inggeris nama C. L. Richardson kena diboenoeh, jang doea lainnja dapet loeka berat. Setelah kedjadian ini direpotken pada pemerentah Inggeris, pembantoenja oetoesan Inggeris di Yedo lantas diprentah boeat minta pada pemerentah Djepang soepaja orang-orang jang soedah lakoeken serangan itoe ditangkep, ditoentoet dan dihoekoem mati serta dibajar penggantian keroegian sedjoemblah 125 riboe pond sterling. Dari ini djoemblah 100 riboe pond sterling moesti dibajar oleh sjogoen dan jang sisanja moesti dibajar oleh daimyo dari Satsoema. Sesoedah dibikin pembitjaraan lama, pembesar-pembesar di Yedo moefakat boeat bajar itoe antero penggantian keroegian, terhitoeng djoega bagiannja Satsoema, tetapi marika menjataken tida sanggoep. boeat djatohken hoekoeman apa sadja pada orang orang jang bersalah, sebab marika itoe ada orang-orangnja daimyo dari Satsoema dan pembesar-pembesar di Yedo tida ada mempoenjai kekoeasaan atas marika. Oetoesan Inggeris laloe minta bantoeannja ia poenja armada. Tanggal 11 Augustus 1863 satoe pasoekan kapal perang Inggeris masoek di Teloek Kagoshima boeat dapetken kepoeasaan sepenoehnja dari daimyo Satsoema, seperti jang diminta oleh pemerentah Inggeris. Pada daimyo dari Satsoema dikirim ultimatum, jang minta pemboenoeh itoe lantas ditangkep dan dihoekoem mati. Pembesar-pembesar dari Satsoema menjaoet, orang jang bersalah soedah melariken diri, tapi nanti ditangkep dan dihoekoem sebegitoe lekas dapet diketahoei di mana ia berada. Orang Inggeris tida maoe bikin pembitjaraan lagi tentang fatsal-fatsal jang marika minta dalem ultimatumnja. Tanggal 14 dan 15 Augustus itoe pasoekan kapal perang Inggeris laloe tembaki Kagoshima dan moesnaken ba-
72
73
