rika pikir pemerentah Tiongkok tida djalanken betoel boeninja perdjandjian-perdjandjian itoe. Lebih djaoeh negeri-negeri asing paksa ditentoeken dalem itoe perdjandjian-perdjandjian baroe, pemerentah Tiongkok moesti kasih tanggoengan tjoekoep pada pendita-pendita kristen di Tiongkok dan orang~orang Tionghoa jang soedah masoek kristen. Banjak onar dan keroegian soedah diterbitken pada Tiongkok oleh ini perdjandjian boeat melindoe-doengken pendita-pendita kristen dan marika poenja pengiring-pengiring Tionghoa.
Perdjandjian-perdjandjian pertama, jang dibikin oleh Tiongkok sama negeri-negeri asing, tida bitjaraken oeroesan tjandoe. Perdjandjian sama Amerika menentoeken, rajat Amerika jang kasih masoek tjandoe atawa lain barang terlarang di Tiongkok, tida aken dapet perlindoengan dari pemerentahnja. Tapi perdjandjian sama lnggeris tida seboet~seboet fatsal perdagangan tjandoe. Pembesar-pembesar Tionghoa poen tida berdaja oepaja lagi boeat basmi perdagangan tjandoe. Di taon 1858 pemasoekan tjandoe di Tiongkok, jang dilakoeken oleh orang-orang dari semoea bangsa, selaloe bertambah banjak sehingga djoemblahnja dalem setaon tida koerang dari lima riboe ton.
Perdjandjian-perdjandjian jang dibikin di Tientsin tida bikin perobahan dalem ini keadaan. Tjoema dari perdjandjian sama Amerika dibikin hilang itoe penetepan jang bilang, rajat Amerika jang smokkel tjandoe di Tiongkok, tida dapet perlindoengan dari pemerentahnja. Selandjoetnja djoega toekang smokkel bangsa Amerika aken dapet perlindoengan dari pemerentahnja. Orang Amerika andjoeri orang Inggeris dalem daja-oepajanja boeat dapetken soepaja perdagangan tjandoe diakoe sah oleh Tiongkok. Rantjangan tambahan tarip bea, jang dibikin oleh oetoesan Inggeris dan wakil-wakil Tiongkok, achirnja sahken pemasoekan tjandoe di Tiongkok dengan tentoeken, atas tjandoe itoe dikenaken bea masoek dari 30 tael boeat tiap-tiap peti dari 133⅓ pond. Begitoelah sesoedah doea poeloeh taon bertjidra sama negeri-negeri Barat dan doea kali alamken peperangan sama negeri Barat, pemerentah Mantjoe terpaksa brentiken daja-oepajanja boeat tjegah masoeknja tjandoe di Tiongkok dan sedjak itoe waktoe tjandoe mendjadi ratjoen hebat boeat rajat Tionghoa.
Di antara taon 1842 dan 1856 orang Inggeris telah sewa dari Tiongkok sebagian ketjil dari djasirat Kowloon di sebrangnja poelo Hongkong. Maksoednja Inggeris sewa itoe sepotong tanah adalah soepaja bisa lebih baek perlindoengken pelaboean Hongkong. Kemoedian, dengan perdjandjian tambahan jang dibikin di Peking dalem boelan October 1860, ini sepotong tanah di Kowloon dikasihken boeat selama-lamanja pada Inggeris.
Sementara itoe di sebelah Oetara dari Tiongkok orang Rus telah dapet dari Tiongkok sepotong tanah jang besar sekali. Orang Rus soedah lama berdaja boeat robah wates antara Siberia dan Tiongkok boeat marika poenja keoentoengan. Peperangan dari Tiongkok melawan Inggeris dan Frans memberi kesempatan pada Rusland boeat kaboel ken keinginannja itoe. Tanggal 28 Mei 1858 graaf Nicolas Muravieff bikin di Aigun satoe perdjandjian sama Tiongkok, dengan mana ditentoeken soengei Amoer mendjadi wates antara Siberia dan Tiongkok. Perdjandjian ini disahken oleh keizer Mantjoe pada 14 Juni, jaitoe satoe hari sesoedahnja dibikin perdjandjian sama Rusland di Tientsin. Waktoe tentara serikat doedoeki Peking dalem boelan October 1860, oetoesan Rus di Peking, generaal Ignatief, goenaken itoe koetika jang pemerentah Mantjoe lagi kebingoengan, boeat bikin satoe perdjandjian baroe sama itoe pemerentah. Perdjandjian ini diteeken pada tanggal 14 November dan kasihken pada Rusland hak seorang diri atas daerah pasisir di sebelah Timoernja soengei Ussuri dan Amoer.
Kelemahannja Tiongkok dalem beroeroesan sama negeri-negeri Barat pada masa itoe disebabken boeat sebagian oleh halnja keizer Mantjoe, jang semasa itoe bertachta di Tiongkok, memangnja ada seorang jang bersemangat lemah, jang sanget mengetjiwaken pada leloehoer-Ieloehoernja jang gagah-berani dan boeat sebagian lagi oleh halnja di dalem negeri Tiongkok sendiri terbit pembrontakan jang maha besar, jang terkenal dengan nama pemberontakan Tai-Ping dan dikepalai oleh seorang nama Hung Hsiu-Ch'uan (Ang Sioe Tjhwan).
Hung Hsiu Ch'uan terlahir dalem provincie Kwangtung dalem taon 1813. Maski sedari anak ia terkenal pinter dan soedah loeloes dalem beberapa examen, tetapi boeat examen boeat dapet gelaran Chu-jen (ki-djin) ia gagal beoelang-oelang. Dalem taon 1847, sesoedah gagal penghabisan kali boeat itoe examen, ia beladjar sebentar sama I. J. Roberts, seorang pendita bangsa Amerika. Dalem taon 1848 ia diriken seboeah perkoempoelan igama, jang ia namaken „Perkoempoelan dari Toehan”, boeat bikin habis kepertjajaan tachajoel dan siarken pemoedjaan pada Allah jang sebenarnja, jang toenggal. Di taon 1850 sepak-terdjangnja ini perkoempoelan baroe telah menarik perhatiannja ambtenaar-ambtenaar radja. Dalem boelan Augustus dari itoe taon dikirim tentara boeat bikin antjoer itoe perkoempoelan. Ini tentara radja diboenoeh habis dan itoe gerakan, jang asalnja meloeloe gerakan igama, lantas berobah djadi satoe pemberontakan melawan bangsa Mantjoe.
46
47
