Halaman:Tao Teh King.pdf/256

Dari Wikisumber bahasa Indonesia, perpustakaan bebas
Halaman ini tervalidasi

TAO TEH KING.


per satoe, jang manoesia tjoemah bisa kenal sabagian jang paling ketjil. (Ajat 1).

Aken bisa mengenai dan bersatoe pada Tao orang tida oesah terlaloe banjak omong dan djoega djangan perhatiken, meliat atawa mendenger ini doenia poenja segala oeroesan tektekbengek jang sia-sia dan sifatnja tjoemah saliwatan. Apa jang terlaloe menondjol ia bikin rata, jang sanget tadjem dibikin poentoel, jang mentjorong dibikin soerem, artinja: segala sifat dalem diri dan tabeatnja jang terlaloe madjoe dan besar haroes ditarik moendoer dan diketjilin, soepaja achirnja djadi tjotjok sama boemi poenja sifatjang paling rendah, sebab demikianlah ada sifatnja Tao.

Manoesia jang terlaloe toeroetin pantjadrijanja soedah boleh dipastiken aken tersasar teroesmeneroes, tida bisa bersatoe dengen Tao, sebab itoe otak jang terlaloe tadjem dan tjerdik tjoe­mah timboelken pikiran li-kiat atawa tjoerang; mata jang terialoe awas boeat kenalin djelek dan bagoes atawa aloes dan kasar, tjoemah tim­boelken rasa temaha, sedeng pendengeran koe­ping jang tadjem kabanjakan menimboelken kemaroek pada oempakan dan boedjoekan dari soeara merdoe dan lemah-lemboet, atawa djadi korban asoetan dan katjoeriga'an. Tjoemah dengen toetoep itoe moeloet, mata dan koeping dari segala penariknja doenia — seperti di dalem meditatie atawa mengeningken tjipta — baroelah itoe segala sifat jang kakoerangan atawa kalebihan dapet dibikin djedjek, hingga bisa bersa­toe pada Tao, boeat mana paling perloe orang haroes singkirken segala apa jang bisa menjérét padanja ka djoeroesan oetamaken atawa kamoekaken diri sendiri. (Ajat 2).

240