TAO TEH KING.
an dan kabesaran, lantaran pengartiannja tjètèk dan serba koerang. Dalem roemah-roemah gila ada banjak orang jang kena sakit moeroeng (melancholic insanity) tida soeka bitjara apa-apa, hanja tinggal bengong dan doedoek diam di tempat soenji. Pada banjak familie ada terdapet anak-anak atawa orang toea jang otaknja toempoel dan bertjatjat toeboeh, jang tida perna banjak omong atawa kasih liat kagoemilangan dirinja. Di desa-desa ada banjak orang-orang tani jang begitoe bodo, doesoen dan pemaloean serta penakoet, hingga selaloe bertoendoek pada orang-orang jang lebih tinggi atawa pintar dan toeroet prentahnja dengen tida brani menjataken pikiran apa-apa. Ini matjem golongan manoesia mengambil sikep begitoe soedah tentoe boekan sekalih lantaran marika mengenal baek pada Tao. Apa jang Lao Tze maksoedken adalah oentoek orang-orang pande dan achli-achli pemikir jang, maski ada poenja banjak kamampoean aken bikin dirinja dikagoemin, dipoedja dan dihormat oleh orang banjak, tida soeka tondjolin dan banggain itoe, boekan sebab penakoet, pemaloean atawa hatinja koerang tabah, hanja kerna soedah mengarti dan taoe dengen pasti jang itoe kamentèrèngan tida bergoena, hanja lebih soeka dapetken kasenangan dan katentremannja dengen persatoeken diri pada Tao, pada itoe Wet dari Alam jang maha besar dan kekel.
Dari sifatnja benda-benda alam orang bisa taoe bahoea di dalem itoe sikep mengalah dan tida membantras, ada tersemboeni tenaga dan kakwasaän jang besarnja tida berwates. Itoe aer jang selaloe mentjari tempat jang paling rendah dengen tida perdoeli memboelak-belok dalem
98
