Halaman:Tao Teh King.pdf/113

Dari Wikisumber bahasa Indonesia, perpustakaan bebas
Halaman ini tervalidasi

MENAMBAHIN PADA JANG KETJIL.


Lantaran begitoe ada gampang aken dimengarti apa sebabnja orang poenja perboeatan, tabeat dan kabiasa'an sahari-hari, bisa datengken apa-apa jang enak dan tida enak bagi dirinja, kerna perboetan jang sombong, bangga, angkoeh, agoengin diri dan gila hormat, soedah pasti aken timboelken reactie jang beroepa kahina'an, djengèkan dan kabentjian, boekan tjoemah lantaran tabeatnja publiek selaloe membentji pada orang jang bersikep begitoe, tetapi watek dari itoe sikep sendiri memang moesti membawa atawa membangkitken itoe matjem kahina'an jang aken mengimbangin sasoeatoe perboeatan soepaja tida djadi miring atawa berat sabelah.

Dengen adanja itoe matjem imbangan maka barang siapa bisa pernahken diri soepaja menjotjoki sasoeatoe ka'ada'an, merendah pada sesama manoesia, tida terlaloe soeka tondjolin kapandeannja, hanja kosongin dan ketjilin diri dengen berdiam di blakang sambil menjingkir dari pertentangan pada siapa djoega, pastilah aken trima penambahan jang beroepa ka'agbengan, kahormatan, perèndahan dan kapoedjian dari orang banjak, kerna tida ada satoe orang jang ia bikin mengiri, djeloes, merasa diroegiken atawa disaingin, hingga dengen begitoe dalem saoemoer hidoep ia terloepoet dari segala hal tida enak, lantaran mana ia bisa poelang aken bersatoe pada Tao, jang djadi iapoenja „roemah“, dengen slamet dan tentrem.

Tapi soedah tentoe itoe berkah jang Lao Tze maksoedken disini sabagi hatsil dari sikep mengetjilken diri, boekan perboeatan dari orang-orang bodo, gendeng dan idioot jang tida bisa tondjolin dirinja ka depan, oendjoek kasombong-

97