"Mano ang Sutan Lembak Tuah, antakan surek ka tangsi baru, kapado sapia nan disanan." katonyo Tuan Sapia.
Dek rang mudo Lembak Tuah, diambiak surek nan balipek,surek dikirim Tuan Sapia, lalu bajalan bagageh-gageh.
Alah sarantang pajalanan, cukuik kaduo rantang panjang, maliek juo kiri kanan, urang nan rami di jalan rayo, banyak basilang motor kureta.
Hiruak pikuak di tangah jalan, bunyi bendi badarun-darun, bunyikureta badasiah-dasiah, tidak tabado banyak urang, indak tantu Cino jo Kaliang, tacangang cando Lembak Tuah, maliek urang sangaik banyak, toko baririk suok kida.
Sadang maliek tacangang-cangang, tampaklah bendi balari kancang, kudo takajuik maso itu, balari bak alang tabang, kusia di dalam tidak ado, tibo di bendi bendi ramuak, tibo di urang urang mati, kudo manduo balari kancang,surangpun tidak dapekmanolong, hilang aka urang nan banyak, cameh pikiran maso itu.
Kan iyo Sutan Lembak Tuah, dikaja kudo dipintasi, indak ado manaruah ta kuik, dek untuang takadia Allah, kudo ditangkokdek Lembak Tuah, urang maliek habih tacangang, maliek barani Lembak Tuah.
Didukuang anak dalam bendi, anak baduo di dalam nyo, didukuang dibaokturun, urang maliek panuah sasak, kok tidak lakeh katolongan, alamat bendi masuak kali, baranang dalam ayia, anak baduo hancua luluah.
Indak barapo lamo antaronyo, tibolah bapak anak nantun, anak residen kota Betawi, bakato cando Tuan Residen, "Manolah buyuang rang manolong, marilah kito pulang dahulu, kok tidak katolongan dari waang, alamat matianak kanduang, bacarainyawo dangan badan."
Sanan manjawab Sutan Lembak Tuah, "Manolah Tuan ampunyo anak, ambo iko urang tahukum, disuruah Sapia maantakan
