-107-
Tje Ong pertjaja sadja in omongan dan lantas titah sang pengiring boleh bawa kombali itoe moetlara serta trimaken poela pada Gwi Ong jang laloe menjimpen baek dalem kantong badjoenja.
Sampe pada waktoe perdjamoean soeda ditoetoep atawa Gwi Ong telah balik kombali di Kim Teng Koan Ek, lantas sadja ia panggil mengadep The An Peng, Tjoe Haij, Tji Kak, Houw Eng dan laen-laennja panglima lagi boeat sama-sama dateng berhimpoen.
,,Ja," demikian sabdanja apabila sekalian mantri-mantri soeda rata berkoempoel. ,,tadi Kho bersama Tje Ong ada doedoek djamoean di Ban Hoa Wan, tiba-tiba terbit angin santer jang menioep pasir dan deboe djadi berhamboeran kian kemari, maka Kho jang mempoenjai Phie Kheng Tjoe di badan, soeda pasti tiada aken ke dapetan barang setitik deboe jang dateng menempel dan inilah menerbitken Tje Ong ampoenja keheranan sembari adaken pertanjaän. Sewaktoe koerang pikir, Kho telah bitjara teroes terang prihal Phie Kheng Tjoe, menjebabken dia timboel keinginan boeat minta liat, tapi satoe kali soeda meliat, lantas dia ingin menoekarin sadja dengen diapoenja doea kota Lian Shia. Samentara Kho pikir, ini
