-39-
begitoe roepa terhadep Bang Koan, hingga membikin siapa djadi ketakoetan setenga mati, aken kemoedian dengen goegoep dan zonder perdoeliken laennja, sigra mandjat naek begitoe tjepet ka atasnja seborah poehoen besar di samping paling deket, di mana ia lagi berada.
Matjan itoe seperti orang jang lagi menaro dendeman hati pada Bang Koan, agaknja sengadja mendesek teroes dengen tinggal meringkoek di betoelan bawah poehoen terseboet. Dan tentoe sadja keadaan mana semingkin-mingkin menimboelken ketakoetannja Bang Koan, jang achirnja kepaksa berkaok dari atas poehoen dengen soeara keras, katanja:
„Och, Toako, kitaorang jang sama-sama satoe perdjalanan, koedoe djangan meninggalken kawan, hanja tjobalah sebrapa bisa menoeloeng padakoe...... djangan sampe binasa di ini tempat.”
„Enko matjan!” kata poela Soen Pin terhadep itoe binatang, „ketahoeilah jang lagi berada di atas poehoen, adalah soedarakoe sendiri, Bang Koan, soekalah kaoe oendjoekin lagi satoe kali kemoerahan hati, agar dia bisa toeroen ka bawah boeat sama-sama akoe melandjoetin perdjalanan.”
