-216-
Dalem kotak kajoe tersimpen njanjian jang langka,
Tahanlah napsoe, sabarken hati kendati terloeka;
Kaloe ingin keloear roemanja Bang Koan, si doerhaka,
Belagalah edan, soepaja diri terloepoet dari tjilaka.
Apabila Soen Pin soeda membatja itoe sairan, djadi bingoeng terlongong - longong sampe sesaat lamanja.
„Oh, kiranja Soe Hoe djoega ingin akoe bisa belaga edan," berpikir Soen Pin dalem hatinja seraja ambil keloear lagi itoe boeng-koesan kertas dari dalem kotak dan boeka preksa isinja, ternjata itoelah ada obat boe-boek, dengen di atas kertas boengkoesan-nja ada tertoelis bebrapa hoeroef ketjil jang berarti: ,,Boleh goenaken ini obat, gosok rata pada selebarnja bekas loeka dan sakir."
Soen Pin menoeroet itoe atoeran, gosokin rata obat boeboek mana pada tempat-tempat jang bekas dikoetoengin dan bener sekali dalem sekedjapan mata sadja, itoe kesakitan heibat pada kedoea kakinja sigra djadi brenti sama sekalı, begitoepoen lapoenja nana dan dara tiada poela keliatan ada mengalir keloear.
