-482-
Itoe malem, di seblahnja kerepotan bebena ini itoe, poen ada diboeka perdjamoean besar oentoek memperingetin marikapoenja kemenangan, di mana semoea panglima ketjil besar, sampepoen seantero soldadoe-soldadoe, pada doedoek makan-minoem dengen segala kegoembirahan dan mabok-mabokan sepoeasnja.
Besok paginja, antero pasanggrahan telah dibongkar, sedeng semoea pasoekan satoe- persatoe moelai brangkat meninggalken goenoeng Kioe Jauw San, dengen di sepandjang djalan saben-saben tiada brenti kedengeran tetaboean menang perang, berikoet soeara tampik-sorak jang gemoeroeh dan bersemangat.
Belon ada sepoeloe hari lamanja, zonder menampak rintangan apa-apa, antero pasoekan soeda sampe di kota Lin Koe Shia. Di mana, sesoeda lebi doeloe mengatoer beres pasoekannja, Lo Ong bersama Soen Pin laloe masoek ka dalem kraton mengadep baginda Tje Ong, merapportken segala apa jang telah kedjadian di medan perang, sampe kapada halnja telah dapet menaloekin itoe ketiga kepala brandal dari Kioe Jauw San.
Alangkah girangnja sang baginda setelah mendenger abis semoea rapportan dan se-
