maingkih-ningkih, garambeh sisunguik tidak bacukua, alah mahitam di bawah hiduang.
Sajak barangkek dari Banjarmasin, sangajo bana indak bacukua, sarupo urang mintak sadakah, buruak bana roman si Alam, tibo di ateh kureta api, duduak bamanuang manyisiah surang, ado surang urang kayo, ibo maliek si Sari Alam, dibari sadakah sabenggo, dijawek pitih pambarian, sakik paruik manahan galak.
Dek lamo kureta bajalan, tibo di tasiun Bukittinggi, di sewo bendi ka kampuang, kudo bajalan lari kancamg, hampia ka tibo inyo turun, alah sangajo dalam hati, turun jauah dari rumah mandeh, kiro-kiro saratuih meter, bajalan juo maningkih-ningkih, kambuik basandang dibahu, batungkek jo rantiang batuang, bajalan juo ka rumah mandeh.
Dari jauah tampak si Nurani, mamikua ayia di parian, baru maliek adiak kanduang, lintuah pikiran Sari Alam, tibo di laman rumah, dikaja dek mandeh kanduang.
“Anak den si buyuang Saba, kini baru Buyuang pulang, pulang mularaik anak kanduang,” bakato mandeh jo Nurani, maliek parasaian Sari Alam, dipapah anak dibaok ka rumah.
“Sakik bana kaki waang, barisuak mandeh carikan ubek,” kato mandeh maisak-isak, ibo maliek parasaian anak kanduang.
Sari Alam duduak basanda, ado sabanta antaronyo, ditatiang nasi dek Nurani, nasi talatak dalam katidiang, katidiang ketek dari batuang, talatak samba maco bapanggang, duo jo taruang bauwok, samba lado asam durian.
Maliek samba nan bak kian, titiak ayia mato Sari Alam, mularaik bana mandeh kini, diliek pulo baju Nurani, baju batamba di pungguang, ibo hati mamandangi, makan lah Sutan Sari Alam, dek lamak makan nasi rang gaek, habih nasi sakatidiang, maliek makan anak kanduang, manangih mandeh jo Nurani, ibo maliek parasaian, sanan bakato mandeh kanduang,
88
