Manjawab Sutan Sari Alam, “Kalau bak itu naiaklah ambo.”
Alah naiak Sari Alam, duduak baselo tangah rumah, supayo nak jaleh urang nantun, sanan bakato si Katijah, “Amai ambo banamo si Anun, kini sadang di balai, sabanta lai inyo pulang, mandeh manjua bika, itu galeh sajak dahulu.”
Mandanga kato nan bak kian, baru yakin si Sari Alam, bahaso iko bini si Malin, diliek rupo dipandangi, tidak inyo miskin bana, rumahnyo gadang limo ruang, rumah baukia baatok ijuak, bakato Sari Alam,
“Mano anaknyo Malin Saidi, pasan jauah ambo baok, Malin Saidi lai bakirim pitih limo ratuih, duo ratuih untuak anaknyo, duo ratuih lai untuak amainyo, saratuih lai untuak adiknyo.”
Mandanga pakiriman sabanyak itu, tacangang sajo padusinyo, sarupo urang barasian, kan iyo anak nan baduo, balari-lari ka rumah bako, manjapuik mandeh Malin Saidi, ado sabanta antaronyo, lah tibo mandeh Saidi, satu tibo inyo batanyo,
“Mano anak ambo si Rasyidin, nan bagala Malin Saidi, di mano kini anak nantun, mangapo tidak dibaok sarangkek, hanguih jantuang ambo dek taragak, ampek musin indak pulang,” bakato sadang manangih. Maliek rupo damikian, takana mandeh di Bukittinggi, ado sabanta antaronyo, ditatiang nasi tangah rumah.
Kan iyo Sutan Sari Alam, hatinyo sanang sakutiko itu, raso bamalam di rumah mandeh, urang elok samo sakali, saraso basuo jo mandeh kanduang.
Hari samalam malam nantun, dipapakan curito parasaian, sajak barangkek dari rumah, sampai balarek ka Banjarmasin, sabuah tidak katinggalan, di nan rusuah urang manangih, tibo di nan elok bagalak-galak.
“Ambo di kampuang tigo bulan, lapeh nan dari tigo bulan, babaliak ka rantau, ambo tibo si Malin pulang, bak itu rundiangan
84
