Halaman:Siti Kalasun.pdf/85

Dari Wikisumber bahasa Indonesia, perpustakaan bebas
Halaman ini telah diuji baca

nasi, tampak Daeng Belonggo, basalam inyo katigonyo, lorong kapado Daeng Belonggo, urang kayo di Banjarmasin, banyak manaruah barang-barang, tokonyo gadang tigo pintu, urang kayo randah hati, suko manolong urang miskin.

 Lah sudah tutua batutua, hari hampia pukua sapuluah, bajalan ka tapi hanggar, sangaik rami palabuhan Belawan, kapa balabuah ampek limo, kapa Eropah duo buah, kapa gadang kaduonyo, lah naiak kapa katigonyo, kapa ketek kapa barang, panuah barang di dalamnyo.

 Ado sabanta antaronyo, batulak kapa dari Belawan, tingga nagari Medan Deli, kapa maharuang lautan basa, tiok sabanta tiok singgah, singgah di Siak Indogiri, singgah di Bagan Siapi-api, di Riau Tanjung Pinang, sampai pulo ka Selat Panjang, masuak taruih ka Sungai Siak, singgah pulo di Pakanbaru.

 Sahari di Pakanbaru, babaliak pulo ka selat Panjang. Lapeh nan dari Sungai Batang-hari, lah tibo di lawik gadang, singgah pulo di Batanghari Jambi, baranti di Muaro Jambi. Tak lamo kapa singgah, tibo pulo di Bangka Tanjung Pinang, dek lamo lambek di lawik, tibo di muaro Batang Kapuas, sampai kapa di Banjarmasin.

 Kan iyo samaso itu, ayia gadang pasang naiak, hampia sampai ka lantai rumah, rumah urang tinggi-tinggi, maliek rupo nan bak kian, tacangang sajo kaduonyo, rumah tarapuang di tapi ayia, sampan banyak hilia mudiak.

 Jauah bajalan banyak diliek, lamo hiduik banyak dirasai, disangko langang Banjarmasin, kironyo nagari rami, sagalo bangso ado di sinan, urang Jawa jo urang Dayak urang Kaliang urang Cino, urang Ulando ado pulo, toko talatak di tapia ayia.

 Alah sahari duo hari, cukuik sapakan duo pakan, dicubo mambuek roti, mamanggang roti baketek-ketek, si Malin Saidi mambuek limun, limun siturup jo limunade.

74