Halaman:Siti Kalasun.pdf/83

Dari Wikisumber bahasa Indonesia, perpustakaan bebas
Halaman ini telah diuji baca

 Manjawab urang nantun, “Itu kato sabananyo, apo mukasuik pado ambo?”

 Manjawab Sutan Sari Alam, “Kami nangko urang Minang, tukang roti di Jit Mo, nan batoko di Kesawan, kami pandai mamasak roti, pandai pulo mambuek limun, sarato mambuek tempe, baitu juo gulo-gulo. Mukasuik kami nak pai ka sinan, iyo ka nagari Banjarmasin, ka mano jalan ka sanan, balun parnah kami ka sinan.”

 Mandanga kato Sari Alam, tagalak urang Banjar nantun, dibari surek sacariak, inyo banamo Daeng Belonggo, urang Bugih Balanipah, inyo urang kayo Banjarmasin, barisuak inyo babaliak.

 “Liek ambo di Belawan, nantikan sajo di jalan Siak, sabalah Cino tukang jahik, pukua sapuluah kapanyo barangkek,’” kato Daeng Belonggo.

 Mandanga kato nan bak kian, sanang hati kaduonyo, babaliak nyo ka Kesawan, tibo di rumah tukang roti, tampak Jit Mo sadang duduak, dari jauah maangkek tangan, bakato si Malin Saidi.

 “Manolah Baba induak samang, mukasuik hati ka bajalan, hari barisuak kami barangkek, ka Banjarmasin ka Kalimantan, bari izin kami dek Baba, kini juo kami baranti, baranti karajo mamasak roti.”

 Mandanga kato si Mali, tacangang Cino toke roti, ibo hati malapeh kaduonyo, bakato toke nantun, “ndak guno kalian bajalan, nagari jauah ka di turuik, elok di siko bakarajo, ditambah gaji saketek, asa kalian tidak bajalan, kami gaji ciek rupiah, ciek rupiah gaji sahari.”

 Manjawab rang mudo nan baduo, kareh juo nak bajalan, dilapeh juo kaduonyo, dibari pitih anam puluah rupiah, anam puluah untuak baduo, manarimo pitih anam puluah, sanang hati kaduonyo.

 Kan iyo hari barisuak, bajalan kaduonyo ka tasiun, dibali karicih ka Belawan, kureta api pukua anam, lah tibo di Belawan, taruih ka kadai nasi, makan jo minum kaduonyo, sadang makan di kadai

72