Halaman:Siti Kalasun.pdf/77

Dari Wikisumber bahasa Indonesia, perpustakaan bebas
Halaman ini telah diuji baca

Ka Banjarmasin


 KABA baraliah hanyo lai, kapado rang mudo si Sari Alam, sarato kawannyo Malin Saidi, dalam nagari Medan Deli, hampia satahun bakarajo, dalam dapua mambuek kue, dek pandai kuek baguru, dek tahu kuek baraja, pandai mamasak mamadu tapuang, lapeh tangan mamasak surang, pandai mambaka bamacam roti, bak itu juo mancetak es, sagalo macam ilmu kapandaian, mambuek tempe jo tahu, sarato mamasak gulo-gulo, induak samang sangaik sayang, gaji batambah-tambah juo.

 Hari Minggu pagi hari, tidak karajo kaduonyo, dapek mupakat bajalan-jalan, malapeh-lapehkan panek maurak-urak badan, dibaok nasi duo bungkuih, cukuik jo ayia dalam boto, bajalan ka Kualo Deli, mandi-mandi bakacimpuang, hati sanang pikiran tabukak, Rami tapian Kualo Deli, banyak urang nan mudo-mudo, mandi-mandi marintang hati, ayia janiah sajuak pulo.

 Kan iyo si Sari Alam, duduak di rumpuik maunjua kaki, bataduah di bawah sikaduduak, hari paneh mambalah banak, duduak baduo jo si Malin, mananti kain masiak bajamua.

 Sadang dek Sari Alam, sungguahpun badan di kota Medan, hati tatap di kampuang, tiok minik tiok hari, pangana kapado Siti Kalasun. Labiah duo tahun di Medan, hiduik mularaik kaduonyo,

66