Mandanga kato nan bak kian, tabik rabo si Kalasun, disangko awak nan mamintak carai.
“Manolah mamak Labai Kari, Angku Kali dalam kampuang, lorong kapado suami ambo, nan banamo Sari Alam, sungguahpun inyo hilang sajo, namun suami tatap suami, junjuangan dunia akhirat, lorong kapado pitih, bia indak turun nafkah, ambo maaf ambo rilahkan, adat biaso urang laki bini, sarupo aua jo tabiang, hiduik nangko sanda manyanda, runtuah aua runtuah tabiang.
Lorong kapado nasib ambo, sudah tuhan mangkadarkan, buruak baiak ambo suko, tandonyo ambo budak Allah, sarahkan sajo untuang ka Nan satu, hanyo sabuah ambo katokan, ambo dating bajapuik, tidaklah ambo datang surang, datang mangadu kapado mak Labai.
Apo sabab mak Labai sarupo itu, mangaik-ngaik galah ka kaki, antaro kami laki bini, hadist nan mano mak Labai pakai, kitab nan mano mak Labai turuik, antah kok hadist buatan muncuang.
Bukan murah jadi kali, kalau tak pandai jadi kali, tukalah sabiah jadi dadu, kambangkan saroban ka lapiak dadu…!” kato berangnyo Siti Kalasun.
Kununlah Angku Kali, mandanga kato nan bak kian, mangigia badan kabangisan, kanai kato di induak-induak, tapacak paluah di kaniangnyo, malu kapado urang nan banyak.
- Kapa balayia ka Suranti
- Nangkodo banamo Syah Alam
- Mambongka sauah di lautan;
- Kaba baraliah hanyo lai
- Kapado Sutan Sari Alam
- Dalam nagari kota Medan.
