Halaman:Siti Kalasun.pdf/69

Dari Wikisumber bahasa Indonesia, perpustakaan bebas
Halaman ini telah diuji baca

sabananyo, kato tando putiah hati, lorong si upiak Siti Kalasun, anak nan sangaik kareh hati, tadayo kapado suaminyo, antah apo nan dibarinyo, pakasiah apo nan dimakannyo, tidak talok jo pangajaran.”

 Mandanga kato nan bak kian, galak malengah si Palindih, manjawab inyo sakutiko, “Manolah mandeh amai Rapiah, bukan ambo bagunjiang, tidak mamutuihkan silaturrahim, kato nan bana ka disabuik, tando samo suci hati, inyo disangko adiak kanduang, ibo ambo maliek paruntuangan.

 Kalau batahun tidak pulang, alamat bakubua di rantah urang, bukan murah pai marantau, tampan si Alam anak nantun, usah baju ka tabali, makan sajo bakurang-kurang, babanak ka ampu kaki, tidak maniru manuladan, adat urang babini, satahun urang dipakai, takacak ameh agak samiang, tiok lasuang maharok dadak.

 Lorong kapado amai urang, anak saparentah awak, bukan awak diparentahnyo, rumah Angku Kali indak jauah, dapek dihimbau disoraki, pailah mandeh ka sinan, banakan sagalo parasaian, insyaAllah lai salasai.

 Bukan ambo maadu urang, bukannyo ambo asuang pitanah, kato anak jo bamandeh, kubak kulik tampak isi, indak ado basumanih”

 Alah sudah inyo barundiang, dikurak dompet di saku, dibari pitih tigo puluah, untuak pambali-bali siriah, untuak pambali pinang jo gambia.

 “Ambiak di mandeh pitih rang Medan”

 Lah panek tangka batangka, diambiak juo dek si Rapiah, mandeh kanduang Siti Kalasun, bakato-kato dalam hati, “Awak rancak hati elok, jarang rang mudo saelok nangko, kok carai Sutan Sari Alam, Palindih dijapuik panggantinyo.”

 Lorong kapado Siti Kalasun, mandanga sajo di baliak dindiang, banci hati mandangakan, laku sarupo setan ibilih, mancarai urang laki bini, mantang-mantang rancak kayo pulo, urang tak sagan di

58