Kunun Sutan Sari Alam, anak urang pahilang aka, mancari sakali sapakan, banyak jalan pado manggaleh, tiok malam pai palisia, bajoget jo manonton, asa gamba batuka, si Alam tibo dahulu, anak tak tahu diuntuang, tidak tahu dibansaik mandeh, di mano pitih ka dapek, baju sahalai tidak tabali, alamat badan lapuak di rantau, kalau ka pulang ka Bukittinggi, tidak saketek balanjo,” katonyo Sutan Palindih.
Mandanga kato nan bak kian, balinang mato si Kalasun, tagah dek malu jo mandeh kanduang, sanan bakato Siti Kalasun, “Mano tuan Sutan Palindih, duduaklah baduo jo mandeh, cucian tingga di sumua, ambo sudah kan dulu, usah Tuan bajalan sajo, di siko Tuan makan patang.”
Manjawab Sutan Palindih, “Usah Adiak batanak pulo, ambo lah makan di mudiak.”
Lah bajalan Kalasun ka balakang, hatinyo hancua pikiran kusuik, disarahkan untuang pado Allah.
Kan iyo Sutan Palindih, duduak baduo jo mandehnyo, bakato Sutan Palindih, “Saba bana si Kalasun, sakitu lamo tidak pulang, kaba barito tidak, manuruik caro hukum syarak, anam bulan jalan darek, satahun jalan lawik, bini di gantuang indak batali, ditupang indak basanda, kalau mangadu ka Angku Kali, jatuah talak satu, bak itu warih kato Nabi.
Cubo pikia bana dek mandeh, si Kalasun anak tungga, tidak ado adiak jo kakak, kok tumbuah mati si Kalasun, elok disabuik buruak nan datang, alamat tingga rumah gadang, sawah jo ladang bak kato urang, urang lain nan kan kanyang,” katonyo si Palindih, maujah tipu jo tepok, kacundang labiah dari kabaji.
Dek lamak layua kato Palindih, tamakan pulo di hati mandeh, sagadang-gadang kayu, tarapuang juo dalam ayia, sanan bakato mandeh Kalasun, “Lorong kapado kecek Sutan, itulah kato
56
