sipatu lokak kalaf kuniang, bakilek rupo sipatunyo, jando si Ani maso dahulu, kini inyo mambujang, baru pulang dari Medan.
Kan iyo Sutan palindih, kureta diputa balambek-lambek, mamandang rupo Siti Kalasun, takilik iman mamandangi, maliek rancak si Kalasun, rupo putiah muko bulek, sarupo bulan ampek baleh.
Dek mamandang-mandang juo, batamu mato samo mato, lintuah hati si Palindih, kanai garijok suduik mato, iyo juo bak pantun urang.
- Api-api tabang ka dusun
- Tibo di dusun taruih ka banto;
- Indak mati kanai racun
- Mato dibunuah suduik mato
Manyapo si Siti Kalasun, “Oi tuan Palindih, singgahlah dahulu, ambo handak batanyo, indak elok duduak di laman, mari ka rumah kito barundiang.”
Ka rumah Sutan Palindih, disandakan kureta dipangka jambu, naiak ka rumah inyo lai, duduak bajuntai dikurisi, dalam barando rumah Kalasun.
“Pabilo Tuan pulang, lai salamik pajalanan, di Medan juo Tuan marantau?” tanyonyo Siti Kalasun.
Manjawab Sutan Palindih, “Lah tigo hari ambo pulang, pulang marantau nan dari Medan.”
Manukeh pulo si Kalasun, “Lai lamo Tuan di rumah?”
“Balun tantu lamo lambeknyo, di cari dulu gantu si Ani, elok juo babini di kampuang, pado babini di rantau urang,” katonyo Sutan Palindih, bakato sambia manyindia.
“Kalau diliek urang nan lain, banyak babini di rantau urang, kalau kawin jo urang dagang, alamat bakubua di rantau urang, jan diharok babaliak pulang, urang dagang kuat pakasiah, lah banyak pulo ambo liek.
52
