Halaman:Siti Kalasun.pdf/61

Dari Wikisumber bahasa Indonesia, perpustakaan bebas
Halaman ini telah diuji baca

 Maninjau padi lah masak
 Batang kapeh batimba jalan;
 Hati risau dibaok galak
 Bak paneh manganduang hujan.

Bajalan ka pasa bawah, dibali lado jo garam, sarato maco minyak manih, cukuik karambia bada lawik, pasa rami maso itu, hari Sabtu pakan gadang, bakelok lalu ka pasa ateh, dibali pulo kain batiak, untuak kodek kain ka dapua, banyak macam dijua urang, pitih sajo nan ditanyoinyo.

 Tarantang jalan Padang Panjang
 Ka kida ka Pandai Sikek
 Ka suok ka Batu Palano
 Ka hilia jalan ka Bukittinggi;
 Jikok dirantang namuah panjang
 Elok dikumpa nak nyo singkek
 Diambiak sajo nan paguno
 Usah bahabih-habih hari.

Alah satahun duo tahun, Sari Alam indak pulang, kaba tidak barito tidak, bak batu jatuah ka lubuak, lorong kapado Siti Kalasun, sudah sumbahyang mandoa juo, salamaik sajo suaminyo, indak ado maro malintang, tiok malam inyo bamimpi, duduak baduo sadang makan, awak tasintak hilang sajo, dirameh paruik dikampihkan.

 Gadang ayia Sungai Panuah
 Hanyuik sagalo daun-daun;
 Carai babulan lai mambunuah
 Kunun carai batahun-tahun.

Birawari Siti Kalasun, sadang duduam di laman, duduak bamanuang-manuang surang, pangana kapado suaminyo juo, lalu si Rasyid Sutan Palindih, sadang di ateh kureta angin, kureta reli baru babali, pakai sarawa pantolan putiah, baju mambo suto taba, rambuik basega di kapalo, loji tangan dari ameh, bacincin ameh parmato intan, awak rancak batambah rancak,

50