Bakato Sutan Sari Alam, “Manolah adiak Siti Kalasun, ka mano garan mandeh kito, tolong himbau agak sabanta, ado sabuah ka dikatokan, mukasuik hati nak bajalan, maaliah langkah ka Medan, hari barisuak ka bajalan, mamintak izin ka mandeh kito.”
Alun salasai ingi bakato, ka rumah mandeh si Kalasun, tidak tarago bahimbaukan, sanan bakato Sutan Sari Alam, “Manolah Mandeh janyo ambo, ado sabuah nan takana, mukasuik hati ka bajalan, iyo ka rantau Medan Deli, bari izin ambo dek Mandeh, Mandeh lapeh jo suci hati, barakik doa Mandeh di rumah, salamaik sajo palangkahan, tidak kurang suatu apo.”
Mandanga kato nan bak kian, takajuik mandeh si Kalasun, lalu bakato hanyo lai, “Pabilo Sutan ka bajalan, elok di rumah Sutan dahulu, manggaleh sarupo nan taralah.”
Manjawab Sutan Sari Alam, “Mukasuik hati ka bajalan, hari barisuak pagi-pagi, di cubo pulo di rantau urang, kok untuang elok palangkahan.”
Kan iyo sahari itu, dibungkuih pakaian nan paralu, lorong kapado Siti Kalasun, didabiah ayam duo ikua, didabiah pulo itiak saikua, dimasak gulai randang itiak, sarato anyang dari ayam, cukuik jo goreng ayam, makanan Sutan dalam oto.
Di hari sahari nantun, rintang manggula duo baranak, tajarang tungku duo tigo, hari samalam malam itu, gilo mamasak jo manggulai, laruik malam mangkonyo lalok.
Duo kali ayam bakukua, cukuik katigo hari siang, lah siang candonyo hari, turun Sutan Sari Alam pai mandi, lah sudah mandi lalu sumbahyang, bagageh bajalan pulang, tibo di rumah minum kopi, bakato hanyo lai,
“Kain salendang dari Bayan
Dibaok urang ka sikaladi;
Tingga adiak tinggalah sayang
Ambo bajalan hanyo lai.”
34
