dibuhua arek dalam hati, kalau malam dipakalang, jikok siang dipatungkek, satitiak tidak dilupokan.
“Lorong kapado kato mandeh kanduang, kalau satitiak ambo lawikkan, kalau sakapa ambo gunuangkan, ambo buhua ganggam arek,” katonyo Sutan Sari Alam.
Mandanga kato anak kanduang, sanang raso paratian, dilapeh anak bajalan, bajalan turun ka laman, bajalan bahati ibo, ibo ka mandeh jo adiak nan tingga.
Anak unggeh makan tanaman
Makan buah cari mancari
Hinggok di rantiang jambu irang
Di ladang urang Koto Tinggi;
Tingga kampuang tingga laman
Tingga surau pincuran mandi
Tingga kawan samo gadang
Ambo marantau ka Medan Deli.
Lah bajalan tagontai-gontai, dituruikkan labuahnan panjang, ado sarantang pajalanan, tibo di laman rumah Siti Kalasun.
Kan iyo Siti Kalasun, baru tampak Sari Alam, balari ka ateh rumah, disapu rumah tampek duduak, bajalan taruih ka dapua, ayia tajarang lah disauak, tahidang nasi tangah rumah.
Aluran si gadih Siti Kalasun, capek kaki ringan tangan, baru tibo suaminyo, disapo jo muluik manih, “Datang darimano garan Tuan?”
Manjawab Sutan Sari Alam, “Ambo nan datang dari mudiak,” sambia duduak baselo ateh kasua.
Bakato pulo Siti Kalasun, “Nasi tahedang makanlah Tuan,” dibukak tuduang saji, nasi basanduak lah dimakan, ayia dicawan lah diminum, dimakan nasi duo suok, cukuik katigo inyo kanyangdibasuah tangan hanyo lai, diisok rokok nan sabatang, asok mandulang ka udaro.
32
