Ditagah tidak tatagah
Bak managah ayia hilia
Disuruah sajo hanyo lai.
Sanan bakato Sari Alam, “Adiak kanduang Siti Nurani, balahan badan dunia akhirat, elok-elok tingga di rumah, jago malah mandeh kito, kok untuang pambarian Allah, tatabuih juo sawah nan gadang, tabangkik tareh tabanam, lapeh mularaik kok lai sanang, hiduik sarupo roda pidati, sakik jo sanang tidak bacarai.”
Nurani tidak manjawab, dijawab sajo jo ayia mato, ayia mato badarai-darai, ibo malapeh tuan kanduang,sanan bakato mandehnyo,
“Anak kanduang sibiran tulang,hanyo sabuah pitaruah mandeh, kok tibo dirantau urang, elok-elok Buyuang di sanan, muluik manih kalau bakato, kawan sahabat nan dicari, lawan bakanti samo gadang, urang ado paadokan, usah bakawan jo urang pamain.
Kok buyuang ka mandi
Mandi di tapi lawik
Kok tidak mandi di pantai
Elok mandi di hulu-hulu
Bakusuak daun pagaran;
Kok buyuang mancari kanti
Cari urang patuik-patuik
Kok tidak urang pandai
Kalau tidak anak pangulu
Urang batunjuak baajaran
Luruih jo bana ka anak pakai, usah budi kalihatan, usah mangicuah jo maaniayo, umbuak-umbi dipantangkan.
Satali pambali kumayan
Sakupang pambali katanyo;
Sakali lancuang ka ujian
Saumua hiduik tidak picayo.
28
