Kan iyo urang di rumah, sibuk karajo kasadonyo,ado satangah maningkok biliak, patuik di ganti lah diganti, patuik disalang lah disalang, nan jauah alah dihampiakan.
Lorong kapado nan gadih - gadih, satangahmamasang kulambu, ado pulo mangarang bungo, kununlah ipa bisan, sarato karib badakatan, rintang mamasak mambuek kue, ka lua kapandaian nan mudo-mudo, kakok buatan surang-surang, nama nan bodoh tidak pandai, disuruah mangacau kuah, disuruah mamipih lado, mangukua karambia jo mambasuah piring. Malang cilako nan tidak pandai, dapek karajo barek-barek, urang marendo awak manumbok, urang manuji manarawang kito manjapuik-japuik ayia, bunyi galak badaraidarai, barapo kecek garah-garah, babaua urang samo mudo.
Bak itu bana heboh urang, namun Kalasun tanangsajo, duduak tamanuang tagak tamanuang, sarupo tabali galeh maha, muko masam tidak baruang, tagah dek malu di urang banyak, kok tidak namuah lari habih, lari dari rumah mandeh.
Karano inyo urang tahu, tahu mangaji kudarat Tuhan, dikaluahkan sajo dalam hati, sudah takadia sajak dahulu, tidak dapek sasuko awak, kito utang manjalankan, putusan datang dari Tuhan, tapi sungguah nan bak kian, ibilih setan maharu juo.
Kalau diliek rumah Kalasun, takambang lapiak parmadani, takambang pulo kasua manggalo, banta basusun di dindiang, banta suto merah jambu, basulam basuji buah anggur, sangaik elok dipandang mato.
Takambang palamin ameh-ameh, di bawah tabia langik-langik, tampek duduak marapulai, rumah sabagai ka tabang, tasusun lamari jo kurisi. Kalau diliek di dindiang, dindiang rumah Siti Kalasun, bareda camin gadang, salo manyalo jam tembok, sarato gamba pamandangan, taratua potret tantang biliak, dalam potret sabanyak itu, tampak potret Siti Kalasun, sadang baundok munawarah, sarupo gadih anak muslimin, sabagai puti dari Mesir, manih rupo dipandangi.
14
