Halaman:Siti Kalasun.pdf/13

Dari Wikisumber bahasa Indonesia, perpustakaan bebas
Halaman ini telah diuji baca

Babaluik Tando

Birawari mandeh Saudah, anak rang kampuang Pincuran Limo, sadang maanyam-anyam sumpik, di bawah lumbuang di laman, hari nan sadang tangah hari, sadang bunta baying-bayang, sadang langang urang di kampuang, sadang litak-litak ayam, tadanga ayam bakukuak, ibo hati laruik pikiran, mangana unntuang bansaik badan.

Kan iyo mandeh Saudah, inyo baranak duo urang, anak sarupo anak balam, sikua jantan sikua batino, nan surang si Buyuang Sabarudin, nan bungsu si Siti Nurani.

Kalau diliek maso dahulu, inyolah urang nan barado, basawah bapiring-piriang, baladang bapetak-petak, dek ulah mamak nan baduo, habih tasando harato bando, mamak baduo pareman gadang, urang panyabuang jo pamupuah, barambuang jo main bakoa, badadu usah disabuik, sagalo parmainan suko sajo.

Bamain bakalah manang, kok kalah inyo manggadai, dirungguahkan sawah ladong, habih kabau jo banting, sawah baransua habih juo, kini tingga sapiriang ketek, tabek jo kincia lindang pulo, kini hiduik mambali bareh, basawah sapangga tahun, mangayam sumpik siang malam, laruik malam mangkonyo lalok, kok lalok lah bakurang-kurang, hiduik sapantun induak ayam, tidak mangakek tidak makan.

2