SATOE GADIS BANDEL.
Sekarang Hoei-nio doedoek di pembaringan dan memandang pada iboenja dengen paras goerem.
„Ja, djangan kira anak lelaki djoega boleh djalan glandangan tida karoeanan! Dan apa jang satoe anak lelaki tida boleh lakoeken, lebi lagi terlarang boeat anak prempoean,” kata njonja Tjoe-bing lebi djaoe. „Itoe soewal kaoe tida oesa pikirin, sebab soeda djadi satoe kepastian, baek lelaki atawa prempoean, apalagi jang masi moeda, djikaloe soeka terlaloe banjak glandangan di waktoe malem, achirnja tida nanti djadi orang jang baek. Jang lelaki djadi badjingan, pemabokan, pemaen-top atawa laen-laen lagi dan jang prempoean djadi boengah raja.”
Parasnja Hoei-nio djadi lebi goerem lagi mendengar perkataän-perkataännja ia-poenja iboe, teroetama jang dioetjapken paling blakang. Ia hendak kaloearken perkataän keras, tapi iboenja soeda baliken badan dan tinggalken ia dengen roepa sanget tida senang.
Bebrapa hari lamanja sasoeda terdjadi itoe pertjektjokkan, Hoei-nio maoe tinggal di roemah. Tapi djikaloe orang kira ia berboeat bagitoe lantaran perhatiken apa jang telah dibilang oleh iboenja, doegaän bagitoe ada kliroe sanget.
Hoei-nio marah, maka djoega ia tida kaloear dari kamarnja. Kombali sang iboe toendjoekken kalemahan hati. Njonja Tjoe-bing prentah baboe anterken makanan ka kamarnja Hoei-nio, kerna koeatir itoe poetri jang ngambek nanti kelaparan dan djadi sakit; dan kombali Hoei-nio dapet kamenangan . . . . . . .
 | Sebuah gambar seharusnya muncul pada posisi ini dalam naskah. Untuk menggunakan keseluruhan pindaian halaman sebagai penampung, sunting halaman ini dan ganti "{{gambar hilang}}" dengan "{{raw image|Siotjia kepala batoe.pdf/8}}". Sebaliknya, jika Anda mampu untuk menyediakan gambarnya, maka lakukanlah. Untuk panduan, lihat Wikisource:Pedoman gambar dan Bantuan:Menambah gambar. |
„Boelan Poernama” No. 18.
8
9
