„Kaoe pande sekali bikin peroepamaän,” kata Hoei-nio, „senang saperti ikan dalem laoetan, merdika saperti boeroeng di oedara.”
„Dan bagitoe beroentoeng saperti Adam dan Eva dalem sorga, kerna kaoe ada di dampingkoe,” menjamboeng Tjing-biauw sambil memandang pada Hoei-nio.
Itoe gadis melengos, kerna maskipoen ia ada satoe gadis jang tida pemaloean, kaloe idoeng lelaki ampir menempel dimoekanja, ia masi merasa maloe.
„Marilah kita brangkat,” berbisik ia.
Tjing-biauw kasi bekerdja masinnja ia-poenja motorfiets dan sasoedanja dapet kenjataän jang Hoei-nio doedoek betoel di blakangnja, ia lariken itoe kandaraän dengen tjepat sekali.
Kamana marika pergi dan apa jang marika berboeat kamoedian itoelah tida oesa diterangken, tapi di waktoe Hoei-nio berada poela di roemahnja, matahari soeda lama silam dan lampoe-lampoe soeda lama dikasi menjalah. Itoe gadis roepanja tjape sekali, kerna bagitoe lekas ia sampe, ia masoek dalem kamar, toeker pakean dan teroes berbaring.
Besok paginja, satelah mata hari soeda naek tinggi, baroelah keliatan Hoei-nio moentjoel dari kamarnja dan katemoeken iboenja, jang ingin minta peritoengan dari poetrinja.
„Akoe maoe tanja, kemaren kaoe pergi kamana, dari tengahari sampe sore dan apa jang kaoe berboeat?”
„Ach mama selamanja soeka riboet lantaran perkara bagitoe. Boekankah Hoei sering bilang, bahoea Hoei boekan anak ketjil lagi jang masi menjoesoe? Hoei tida perloe dianter-anter oleh baboe djikaloe Hoei maoe pergi. Soedalah, mama, djangan tanja ka mana Hoei pergi, kerna Hoei soeda besar, soeda bisa bawa diri sendiri!”
„Tapi akoe tida soeka kaoe pergi ka mana-mana,” kata sang iboe sambil banting-banting kaki. „Anak prempoean djikaloe soeda besar dan belon menikah, haroes membantoe iboenja mengoeroes roemah tangga. Tapi kaoe sama sekali tida ada goenanja. Dari pagi, baroe melek mata, moeloet kaoe sadja dipentang lebar-lebar membikin orang poenja koeping djadi pengang. Djikaloe makanan soeda sedia, kaoe moentjoel boeat makan dan kamoedian pergi dan sampe sore baroe poelang. Apakah kaoe tida maloe?”
„Abis Hoei moesti kerdja apa?”
„Kerdja apa? Selamanja pakerdjaän dalem roemah tangga ada banjak. Djikaloe maoe tida ada kakoerangan pakerdjaän boeat kaoe lakoeken. Kaoe boleh oeroes kaoe-poenja pakean sendiri, djangan moesti beli sadja di toko dengen harga tiga ampat kalih
