247
hiap djoempoet itoe golok dan berdiri di satoe pinggiran.
„Anak,” kata ia, „sekarang akoe pasrahkan ini barang wasiat pada kaoe; tapi apa kaoe taoe asal-oesoelnja ini golok ?”
„Tida taoe,” djawab Ngai Houw jang masi teroes berloetoet.
„Ini golok telah dibikin atas prentahnja radja Goei Boen Tee, Tjo Pie, di djeman Sam Kok dan namanja jang betoel „Leng Poo, tapi dari sebab iapoenja oerat-oerat seperti koera-koera sakti, lantas diseboet djoega „Tjhit-poo-too”. Ia bisa bikin batoe giok dan mengiris emas, dan tida perdoeli sendjata apa sadja, satoe kali terbatjok sama ini golok lantas sadja djadi poetoes. Tjoema sadja ini barang wasiat malaenken bisa dipoenjaken oleh orang jang berboedi dan bidjaksana, bagi orang boesoek dan djahat, biar poen bisa poenjaken tapi tida bisa kekal. Maka kaloe sadja kaoe salah goenaken ini sendjata, nistjaja kaoe aken mendapet hoekoemannja Thian jang heibat. Lagian lantaran kaoe poenja oemoer masi tarlaloe moeda dan baroe sadja mengarti selak-seloeknja penghidoepan manoesia, apa kaoe taoe bahoewa semoewa kadjahatan adalah perkara mengandjoer napsoe birahi ada jang paling heibat dan segala kabaekan malaenken berbakti jang paling teroetama? Kaloe sadja kaoe kena langgar itoe perkara mengandjoer napsoe birahi, biar poen akoe djoega aken mendapat katjilakahan heibat. Maka apa jang akoe pesen baroesan, kaoe moesti inget baek-baek dan simpen dalem hati. Sekarang kaoe moesti bersoempa bahoewa kaoe tida nanti sembarangan memboenoeh orang-orang jang tida berdosa.”
„Apabilah akoe salah goenaken ini golok,” bersoempa Ngai Houw, „biarlah akoe mendapet hoekoeman disamber gledek."
Itoe waktoe baroelah Auw-yang Tjhoen trimaken itoe golok pada Ngai Houw, jang lantas berloetoet dan mendjoera pada iapoenja ajah-angkat. Semoewa orang jang berada di sitoe mendenger Pak-hiap poenja omongan.
