― 317 ―
dan berkata: „Itoe akal bagoes sekali. Tjoema sadja djadi membikin soesa pada Twako.” Sahabisnja berkata ia lantas berloetoet dan maoe mendjoera.
Lioe Ong lantas menjekal lengannja Jan Hoei dan berkata: „Kita jang satoe sama laen mendjadi soedara-angkat, tida perloe moesti mendjalanken itoe peradatan.”
Kamoedian ia lantas panggil boedjangnja boewat menganter Pek Kiok Hwa pergi ka dalem. Di laen fihak ia panggil lagi satoe boedjang laen, pada siapa ia bitjara bisik-bisik. Itoe boedjang lantas bilang baek dan pergi melakoeken pesenannja iapoenja madjikan. Tida antara lama kamoedian dari sabelah depan ada kadengeran soewara riboet-riboet dan satoe boedjang masoek mengasi taoe: „Wan-gwee, iaorang semoewanja soeda dateng dan sekarang lagi mengetok pintoe depan.”
„Kaoe orang djangan goegoep,” kata Lioe Ong.
Sahabisnja berkata ia sendiri pergi kaloewar boewat memboekain pintoe, dalem sa'at itoe djoega ia berhadep-hadepan dengen Tian Lam-hiap dan Hwan-kang-tjie.
„Apa kaoe ini ada toewan roemah ?” menanja itoe doewa orang dengen berbareng.
„Betoel, tida salah,” djawab Lioe Ong sembari manggoetken kapala. „Akoe poenja nama Lioe Ong. Tjoema sadja akoe belon mendapet taoe toewan berdoewa poenja she dan nama jang moelia dan dateng ka sini dengen membawa begitoe banjak orang, maoe ada oeroesan apa ?”
„Kita berdoewa ada Gie-tjian Sam-pin Hou-wie Tjiang-koen,” djawab Tjhio Peng. „Di sabelah blakang masi ada kaoe poenja Tihoe dan Tjongpeng jang berkoewasa di ini tempat. Dan kita semoewa menerima prentah firmannja keizer boeat menangkep satoe pendjahat, sedeng itoe pendjahat telah masoek ka dalem kaoe poenja roemah. Hajo lekasan menjingkir kasiken kita-orang liwat boewat menangkap itoe pendjahat.”
Lioe Ong lantas menjega sama kadoewa tangannja.
„Nanti doeloe," kata ia. Dalem kita poenja roemah sama-
