-310-
teng dan minta itoe golok jang dipegang oleh Thio Liong, jang lantas goenaken boewat memotong tali-tali jang mengikat pada Heng Djoe Liong dan Heng Djoe Houw. Kamoedian ia minta Thio Liong dan Tio Houw menggendong pada itoe doewa soedara Heng.
„Shako,“ kata Tio Houw, „kaoe menggendong Liong dan akoe menggendong Houw, djadinja Liong sama Liong dan Houw sama Houw.“
„Ach, pada waktoe begini kaoe maoe membanjol !“ kata Pang Jan.
Koetika Pang Jan maoe anter itoe ampat orang kaloewar, ditjegat oleh itoe kawanan boedjang jang soeda balik kombali dengen membawa sendjata. Marika memoekoel kalang-kaboetan sama tapalan pintoe, pikoelan dan sebaginja. Kaloe maoe dibitjaraken Pang Jan poenja ilmoe silat, apabila berhadepan sama saorang jang mempoenjai ilmoe kapandean tinggi, soeda tentoe sadja tida ada goenanja, tapi kaloe ia moesti bertanding sama itoe kawanan boedjang, tida berbeda sabagi satoe harimau mengamoek di antara kawanan domba. Maka dalem sedikit sa'at sadja ia soeda amoek itoe kawanan boedjang sampe toempang-sioer; ada djoega jang lantas djiwanja melajang ka acherat; ada djoega jang mendapet loeka berat atawa poen enteng. Achirnja tida ada lagi barang satoe jang brani menjegat padanja.
Pang Jan anter itoe ampat orang kaloewar dari itoe pintoe tembok boender teroes kaloewar sampe di pintoe depan. Itoe orang-orang jang tadi mendjaga, lebih siang soeda pada maboer entah kamana. Sasampenja di loewar pintoe Pang Jan liat itoe pasoekan negri soeda mendatengin. Maka ia lantas balik masoek lagi ka dalem boewat membantoein pada Tian Him Hoei dan Tjhio Peng. Pek Kiok Hwa meliat ini orang bawel dateng kombali, hatinja merasa sanget mendongkol; tapi itoe waktoe ia denger di sabelah loewar ada soewara riboet-riboet dibarengin oleh orang banjak poenja soewara soerakan jang tida berbeda sabagi goenoeng roeboeh kerasnja. Jan Hoei lantas taoe bahoewa ini
