FATSAL XXIII
Sekarang Tian Tjiauw lantaran mendapet taoe bahoewa iapoenja pedang ada lebi koewat dari pedangnja iapoenja tandingan, dengen hati lega ia lantas kaloewarken iapoenja sa'antero ilmoe kapandean silat. Sedang Tihio Peng di sabelah pinggiran membantoe menjerang sama iapoenja sendjata Toesoekan, jang djoega digeraken dengen tjepat dan bagoes. Tapi Tjhio Peng jang tjerdik tida madjoe bertanding hadep-hadepan sama Pek Kiok Hwa, hanja ia meliatin Tian Him Hoei jang lagi bertaroeng sama Pek Kiok Hwa. Pada saban kali Jan Hoei mengasi koetika kosong, lantas sadja ia kasi kerdja iapoenja Toesoekan. Sedang iapoenja serangan tida ditoedjoeken pada bagian sabelah atas, hanja meloeloe ditoedjoeken ka tiga djoeroesan di sabelah bawah.
Tapi ternjata Pek Kiok Hwa poenja ilmoe silat, ada tjoekoep tinggi. Itoe waktoe biar poen ia bertanding sama doewa orang jang ilmoenja tida lebih rendah dari ianja, toch ia melajanin dengen adem dan sekikit poen tida mengoendjoek roepa jang keder. Pada Tian Him Hoei poenja serangan, ia tida maoe kasiken sendjatanja beradoe, Ia bersilat dengen sanget hati-hati sekali; tapi ia mentjari koetika baek boewat membikin poetoes Tjhio Peng poenja Toesoekan. Tjoema sadja Tjhio Peng sendiri terlebih lagi berhati-hatinja. Ia bibin penjerangan dengen maksoed bikin ripoeh pada moesoeh, tapi paling teroetama ia djaga djangan sampe sendjatanja kena dibikin roesak oleh pedangnja iapoenja moesoeh. Dengen begitoe, Pek Kiok Hwa poenja niatan djadi sia-sia sadja.
Jan Hoei pikir lama - kalamahan, tentoe sekali ia bakal terdesek dan kena dikalahken. Maka dalem sa'at itoe djoega ia lantas seroehin boedjang-boedjangnja boewat dateng membantoe padanja. Itoe kawanan boedjang lantas pada pergi mengambil golok dapoer, patjoel, toengket, tapalan pintoe dan apa sadja jang bisa digoenaken sabagi sendjata. Tapi Pang Jan lebih siang soeda berlompat toeroen dari atas gen-
