— 246 —
Itoe anak moeda dengen girang lantas berloetoet dan menjodja pada Pak-hiap.
„Nanti doeloe,” kata Auw-yang Tjhoen, „sekarang di hadepan soedara-soedara sekalian akoe maoe menerangken soeatoe hal, boekannja akoe merasa sajang boewat kasiken ini golok pada Ngai Houw, tapi dari sebab iapoenja oemoer masi terlaloe moeda, akoe sanget koewatir ia salah goenaken ini barang wasiat. Sebab djika sampe kadjadian ia salah goenaken, nistjaja akoe sendiri poen bakal mendapet bahaja katjilakahan jang boekannja ketjil. Tjoema dari sebab Soetee soeda bilang begitoe, memang djoega akoe tida goena simpen ini golok ....”
Bitjara sampe di sini ia berpaling pada satoe hweeshio ketjil dan menjoeroe itoe orang bikin sedia satoe medja sembajang. Tida lama kamoedian itoe barang soeda disediaken dengen lengkep dan di sabelah pinggirnja ditaroken satoe korsi, sedeng itoe golok ditaro di atas itoe medja sembajang. Pada sasoedahnja lilin dipasang dan Pak-hiap pasang tiga bidji hio, kombali ia memandang pada orang banjak.
„Akoe harep toewan-toewan sekalian soeka berdoedoek doeloe sabentaran,” kata ia.
Semoewa orang lantas menoeroet dan ingin liat tjara bagimana itoe golok aken ditrimaken pada Ngai Houw. Itoe waktoe Pak-hiap lantas bersembajang dan lantas tantjepken itoe hio di iapoenja hiolouw, kamoedian ia lantas berloetoet di depan itoe medja sembajang.
„Pada malaekat-malaekat dihatoerken bahoewa akoe, Auw-yang Tjhoen, dapetken ini golok wasiat telah digoenaken memboenoeh boekan sedikit djiwa manoesia, tapi selamanja belon perna goenaken ini golok dengen kliroe. Sekarang maoe dikasiken pada akoe poenja anak-angkat, Ngai Houw, itoelah malaenken tergantoeng atas iapoenja peroentoengan bagimana achirnja,” begitoelah ia mendoa.
Sasoedanja ia lantas panggil Ngai Houw dan soeroe itoe anak moeda djalanken kahormatan besar, berloetoet dan menjodja sampe doewapoeloeh ampat kali, kamoedian Pak-
