— 304 —
Pek Kiok Hwa itoe waktoe soeda toeroen lagi ka moeka boemi, lantas sadja balikin badannja boewat meliat pada itoe orang jang baroe dateng. Ternjata ia itoe ada saorang jang bertoeboeh lima kaki tingginja, moekanja itam dan tangannja menengteng satoe golok; tapi ini orang ada memake djenggot dan koemis pendek. Orang ini boekan laen dari Tio Houw, jang itoe waktoe madjoe menerdjang pada Jan Hoei.
„Apa kaoe ini Pak Hiap?” menanja itoe pendjahat.
Tio Houw jang berdjalan sama Thio Liong, koetika sampe di depan pintoe roemahnja Pek Kiok Hwa, iaorang tida dapet liat pada itoe kadoewa soedara Heng, malah Pang Jan poen tida kaliatan mata-idoengnja. Samentara itoe orang-orang jang mendjaga pintoe depan, lantaran tadi pergi mengoeber Pang Jan tida katemoe, itoe waktoe soeda pada balik kombali dengen tida brentinja mengoetoek dan menggroetoe. Tatkala Thio Liong dan Tio Houw sampe di depan pintoe, marika lagi pada berdoedoek di bangkoe sembari bitjaraken itoe oeroesan.
„Itoe manoesia tjetjongornja seperti satoe bangsat dan boekannja orang baek-baek,” kata saorang.
„Ja, betoel; tjoema heran sekali ka mana ia soeda mengi lang begitoe poenja tjepat,” kata laen kawannja.
Itoe waktoe marika dapet liat Thio Liong dan Tio Houw berdiri di sitoe sembari melongok ka dalem pintoe. Doewa-doewa dandanannja seperti orang gagah dengen di pinggangnja masing-masing ada tergantoeng satoe golok.
„Kaoe berdoewa mentjari siapa ?” menanja itoe toekang djaga pintoe.
Tio Houw jang kasar selamanja tida bisa bitjara haloes dan manis.
„Apa kaoe maoe perdoeli akoe maoe tjari siapa?” kata ia dengen ketoes.
„Ini hari banjak sekali terdjadi perkara-perkara aneh,” kata itoe pendjaga pintoe sembari golengken kapala.
„Hei, apa kaoe tida maoe adjak kita berdoedoek di atas
20
