roen dengen mengakoe Pak-hiap, hingga membikin itoe pendjahat djadi kaget.
Jan Hoei tida brani goenaken iapoenja Tjie-tian-kiam boewat menangkis Pang Jan poenja golok, hanja ia djaga sampe pedangnja beradoe sama moesoehnja poenja sendjata. Begitoelah iaorang bertaroeng sampe lima atawa anam djoeroesan ; tapi Pang Jan mendesak teroes : sasoeatoe batjokan atawa toesoekannja tida maoe mengasi hati pada Pek Kiok Hwa jang kena dibikin keder sama iapoenja gertakan, sedang moeloetnja tida brenti memaki kalang-kaboetan. Di laen fihak Jan Hoei sembari bertanding dalem hatinja berpikir : ini orang djangan-djangan boekannja Pak-hiap ; sebab Pak-hiap orang kalahiran Lauwtong, jang termasoek Tiongkok poenja bilangan Oetara, tapi ini manoesia poenja lagoe bitjara ada lagoe Selatan. Lagian orang seboet Auw'-yang Tjhoen dengen nama gelaran Tji-djiam-pek, lantaran berdjenggot dan berbidji mata blao. Sedeng ini orang sama-sekali tida memake koemis atawa poen djenggot. Akoe moesti djaga djangan sampe kena diakalin menta-menta.
Sahabisnja berkata ia poera-poera membatjok kamoedian teroes berlompat kaloewar dari kalangan dan berseroeh : „Hei, orang asing, toenggoe doeloe sabentaran ! Baroesan kaoe bilang bahoewa kaoe ini Pak-hiap, Auw-yang Tjhoen ; tapi kaoe poenja lagoe bitjara lagoenja orang Selatan. Lagian Pak-hiap diseboet Tjie-djiam-pek, sedeng kaoe tida memake koemis atawa poen djenggot. Dengen begitoe, tjara bagimana bisa soeroep diseboet Pak-hiap ?“
„Maoe menangkap pada kaoe ini, satoe djahanam,“ kata Pang Jan. „masatah perloe ia moesti toeroen tangan sendiri. Ia itoe ada mendjadi akoe poenja goeroe dan kasiken iapoenja Tjhit-poo-too padakoe boewat menangkep kaoe. Pendek, asal sadja akoe ada mempoenjai ini golok wasiat, memboenoeh pada kaoe tida berbeda sabagi djoega memboenoeh satoe ajam gampangnja.“
„Och, manoesia pengetjoet, mengapa baroesan kaoe begitoe tida taoe maloe memindjem laen orang poenja nama ?“
