sebagi orang gagah nomor satoe di saloeroe negri. Djangan-djangan boekan iapoenja tandingan, maka ia moesti berlakoe sanget hati-hati sekali.
„Hei, Auw-Jang Tjhoen !“ kata Jan Hoei, „Akoe sama-sekali tida bermoesoehan satoe apa sama kaoe, apa perloenja kaoe tjari stori sama akoe ? Menoeroet akoe poenja pikiran, lebi baek berlaloe sadja dari sini.“
„Djangan banjak batjot, trima akoe poenja golok ini !“ berseroe Pang Jan, sebab orang itoe poen boekan laen dari ianja.
Tatkala Pang Jan sampe, dari djaoehan ia liat itoe doea soedara Heng masoek ka pintoe depan ; tapi pada sasoedanja ia menoenggoe lama djoega, blon kaliatan itoe doea soedara kaloewar lagi, lantas ia paksa masoek ka dalem. Koetika ditanja oleh penjaga pintoe, ia maoe tjari siapa. „Maoe tjari Pek Kiok Hoa,“ djawab Heng Jan.
„Di sini tida ada Pek Kiok Hoa (kembang seroeni poeti), tapi kaloe Oeij Kiok Hoa (kembang seroeni Koening) biar poen ada, ini waktoe masi blon megar.“
Pang Jan lantas memaki kalang-kaboet dan tjekal batang lehernja itoe orang kamoedian lantas dikasi persent satoe gaplokan dan ditambah sama satoe tendangan, hingga orang itoe djato berdjoempalitan. Laen-laen boedjang madjoe mengoeroeng padanja, tapi Pang Jan lantas maboer ka djoeroesan Selatan dengen menoeroeti sapandjang pager-tembok. Pang Jan biloek ka Barat, tapi koetika itoe kawanan boedjang mengoeber sampe di sitoe, ternjata itoe orang jang dioeber telah linjap tida kaliatan bajang-bajangnja. Sebab Pang Jan lebih siang soeda berlompat naek dan liwatin itoe pagar tembok.
Sasampenja di sabelah dalem lantas ia berlari menoedjoe ka satoe pintoe taman jang sabelah Salatan dan berlompat naek ka atas satoe pager-tembok pendek, dari mana ia dapet liat itoe doea soedara Heng berlepotan darah dan itoe waktoe djoestroe Pek Kiok Hoa mengantjem sama pedangnja pada itoe doea soedara. Maka ia lantas berlompat toe-
