— 299 —
Jan Hoei kasi prentah orang-orangnja boeat meringkoea pada itoe doea orang, kamoedian ditaro di bawan emper. Itow waktoe Pek Kiok Hoa merasa sanget menjesel, mengapa ia soeda berlakoe begitoe kaboeroe napsoe pada sablonnja menanjaken dengen terang itoe doea orang dateng sama brapa banjak kawan, lantas sadja goenaken kakerasan. Sebetoelnja koetika orangnja kasi taoe atas kadatangennja itoe doea orang, lantas sadja ia mengarti dengen maksoed apa doea orang itoe mentjari padanja. Sebab koetika ia pergi ka kota radja boeat mentjari itoe pakean karadjahan, ia soeda taoe di Khay-hong-hoe ada brapa orang jang bakerdja dan siapa satoe-satoenja orang-orang itoe. Maka baroesan ia soeda soeroe orangnja pergi kaloewar dan tengok itoe doea soedara heng ada membawa brapa banjak orang, dan inilah ada itoe jang melongok kaloewar dan lantas masoek kombali mengasi kabar pada Jan Hoei bahoewa itoe tetamoe tjoema berdoewahan sadja.
Sekarang pada sasoedanja itoe doea orang dibikin loeka begitoe roepa, biarpoen ditanja djoega, tentoe tida maoe tjerita dengen sateroesnja. Tapi Pek Kiok Hoa maoe tjoba djoega, biar poen moesti goenaken lagi kakerasan. Maka ia lantas balikin badannja dan berkata pada itoe doea orang : „Kaoe berdoea mendapet itoe loeka-loeka berat, semoeanja lantaran kaoe orang jang tjari tjilaka sendiri. Dengen baek akoe kasiken kaoe orang masoek ka dalem roemahkoe, tapi kaoe orang sebaliknja soeda mengoetjapken omongan jang koerang-adjar dan menjaboet golok boeat bertanding padakoe. Kaloe boekannja akoe menginget itoe persoedarahan dari satoe goeroe, nistjaja lebih siang akoe soeda anterken kaoe orang poenja djiwa ka acherat. Sekarang kaloe sadja kaoe maoe bitjara jang pantes dan menoeroet atoeran, akoe maoe lepasken kaoe orang berlaloe dari sini. Djawablah akoe poeja pertanjahan dengen sadjoedjoernja, kaloe sajda kaoe orang masi sajang djiwa.“
„Kaoe maoe tanjakan apa pada kita orang ? "menanja Heng Djoe Houw.
