— 298 —
FATSAL XXII.
Pek Kiok Hoa dengen adem malepasken iapoenja djoeba dan menjaboet iapoenja pedang, kamoedian ia poen berlompat ka loewar lataran, memboeroe pada itoe doea soedara Heng. Pertama Heng Djoe Liong membatjok sama iapoenja golok ka djoeroesan moekanja Jan Hoei, jang lantas berkalit dan berbareng dengen itoe menosoek sama pedangnja dengen satoe tipoe jang dinamaken „Pek-Tjoa-toew-Sin.” Heng Djoe Liong lantas kelitken kapalanja ka kanan, tapi tida oeroeng mata kirinja kena tertoesoek oleh oedjoeng pedangnja Pek Kiok Hoa hingga iapoenja bidji mata terkelit kaloewar, dan dengen berloemoeran darah ia djatoe roeboeh ka moeka boemi.
Pek Kiok Hoa lantas memboeroe pada Heng Djoe Houw, jang setelah meliat soedara toeanja roeboeh dengen berloemoeran darah, lantas menerdjang dengen satoe toesoekan golok. Jan Hoei dengen sabar menangkis sama iapoenja pedang, Trang! Soewaranja Heng Djoe Houw poenja golok jang patah djadi doea dan dengen tida mengasi tempo lagi Pek Kiok Hoa batjokin iapoenja pedang ka djoeroesanja iapoenja tandingan Heng Djoe Houw lantaran tida mempoenjai lagi sendjata jang bisa digoenaken boeat menangkis, lantas sadja ia timpoekin itoe goloknja jang tinggal sapotong pada Pek Kiok Hoa. Itoe penjahat terpaksa oeroeng membantjok, sebab ia moesti berkelit boeat kasi liwat itoe timpoekan.
Heng Djoe Houw mendapet ini koetika, maoe balikin badannja oeloer iapoenja tindakan boeat maboer, tapi Jan Hoei dengen tjepet soeda goenaken lagi itoe tipoe „Pek-tjio-toew-Sin” menoesoek ka djoeroesan dadanja Heng Djoe Houw. Oleh kerna Pek Kiok Hoa poenja gerakan begitoe sebat, Heng Djoe Houw tida kaboeroe berkelit dan terpaksa goenaken iapoenja tangan kiri menjampok pada itoe pedang. Tjoema kadengeran satoe soewara ,,Srat!" lantas sadja ampat djeridjinja Heng Djoe Houw djadi koetoeng saparonja. Jan Hoei barengin menendang jang mengenaken badannja iapoennja soetee dan troes djatoe meloso.
