— 295 —
Itoe doewa soedara Heng jang tida bisa oempatken pengrasahan hatinja, lantas oendjoek ia poenja roepa dengen tida bisa berkata satoe apa. Pek Kiok Hoa jang tjerdik dan bermata tadjem, lantas sadja mengerti marika poenja maksoed. Tapi ia tinggal teroes oendjoek moeka manis dan bersenjoem-senjoem.
„Kaoe berdoewa hatoerken slamat pada akoe,“ kata ia, „sabaliknja akoe poen haroes hatoerken slamet pada kaoe berdoewa, baroelah patoet, sebab kaoe berdoewa poenja hal sasoenggoenja haroes sekali diboat girang dan dihatoerken slamet.“
„Kita berdoewa ada mempoenja oeroesan apatah, jang boleh diboewat girang dan dibri slamet ?“ menanja itoe doewa soedara Heng.
„Kaoe berdoewa boekantah sekarang soeda mendjabat pakerdjahan negri, pangkat Liok-pin Hauw-Wie, di bawah prentahnja Khaij-hong-hoe ? Dengen begitoe, di blakang hari boekantah aken mendapet djoeba merah brikoet tali pinggang mas, jang bisa membikin terang namanja leloehoer ? Inilah baroe bisa dianggap sebagi perkara jang menggirangken dan haroes sekali dihatoerken slamat.“
Itoe doea soedara Heng mendenger itoe omongan lantas bersenjoem.
„Kiranja kaoe soeda mendapet taoe bahoewa kita orang telah mendapat pangkat ?“ kata iaorang dengen berbareng.
„Boekan sadja akoe taoe,“ kata Jan Hoei, „malah semoea orang poen taoe hal itoe. Sekarang tentoe kaoe mendjalanken kaoe poenja kawajdjiban dateng ka sini boeat minta kombali baginda keizer poenja pakean kabesaran, sekalian menangkep akoe boeat dibawa ka kota radja, boekantah betoel begitoe ?“
„Masatah akoe brani berboeat begitoe !“ Kata Heng Djoe Liong. „Tjoema sadja lantaran sekarang kaoe soeda mendapat taoe kita poenja kaädahan, kaloe sadja kaoe maoe kasiken itoe barang jang kaoe telah tjoeri, boekan sadja kaoe
